OQO-da alǵash ret qoldanysqa engen energııa qýattarynyń elektrondy kartasy tanystyryldy
ShYMKENT. QazAqparat - Ońtústik Qazaqstan oblysynda alǵash ret energııa qýattarynyń elektrondy kartasy tanystyryldy. Jańadan qoldanysqa engen karta árbir qala, aýdan men aýyldyń energetıkalyq áleýeti jaıly aqparat beredi, - dep habarlaıdy QazAqparat HAA tilshisi.
Ońtústik Qazaqstan oblysynda Kásipkerlik palatasynda ótken jıynǵa aýdandyq fılıaldardyń dırektorlary qatysty. Olar erkin energııa qýattary elektrondy kartasynyń qyzmetimen tanysty. Baǵdardy kez kelgen jerge alyp barsańyz boldy, ol jerde energııa qýaty rezerviniń bar-joǵyn bilýge bolady. Sondaı-aq sanaýly ýaqyt ishinde sol orynda jelige qosylý múmkindiginiń bar-joǵynan habar berip, ol qýattardyń jańa óndirister salýǵa múmkindigin anyqtaıdy. Osylaısha, salýǵa josparlanǵan nysandardyń, sonymen birge ádettegi turǵyn úıdiń ornyn durys anyqtaýǵa múmkindik týyp otyr. Sala mamandarynyń sózinshe, elektrondy júıedegi aqparat saǵat saıyn jańaryp otyrady. 
«Kúndelikti mınýt-mınýtyna, sekýnd-sekýndyna deıin birdeı málimet júredi. Máselen, bizge aýdanǵa kásipker kelse, biz onyń suraǵanyn elektrondyq karta arqyly kórip beremiz. Qaısy nysanda bos qýattyń bar joǵyn, naqty qansha kılovatt ekeni jóninde kóshirmesin jasap, qolyna shyǵaryp bersek te bolady. Sol málimetpen ol «Ońtústik jaryq» kompanııasyna baryp, qajetti qujattaryn ótkize alady», - deıdi oblystyq Kásipkerlik palatasy bastyǵynyń orynbasary Tımýr Naqypbekov.
Bul jańalyq zaýyt nemese kishigirim tseh salýdy, basqa da óndiristi iske qosýdy oılastyrǵan kásipkerdiń jumysyn edáýir jeńildetetini belgili. Elimizde alǵash ret qoldanysqa engizilen energııa qýattarynyń elektrondy kartasyn óńirdiń Kásipkerler palatasy men «Ońtústik Jaryq Tranzıt» JShS-i jasap shyǵarǵan bolatyn. 
