OQO-da áleýmettik jeli arqyly Sırııaǵa barýǵa úgittegen azamat sottaldy

ShYMKENT. QazAqparat - Áleýmettik jeli arqyly azamattardy Sırııaǵa barýǵa úgittegen ońtústikqazaqstandyq turǵyn bas bostandyǵynan aıyryldy. Saıram aýdandyq soty 27 jastaǵy turǵyndy 5 jylǵa sottady, dep habarlaıdy QazAqparat HAA tilshisi.

Sot barysynda aıyptaý úkimin oqyǵan sýdıa Saltanat Qabylova Ábilqasym Qajyrhanovtyń uıaly telefon arqyly áleýmettik jelilerge shyǵyp, terrorızmdi nasıhattaǵany úshin sottalatynyn aıtty. Ol QR Qylmystyq kodeksiniń 256 baby 2 bóligimen «Terrorızmdi nasıhattaý nemese terrorızm aktisin jasaýǵa jarııa túrde shaqyrý» áreketi boıynsha kináli dep tanylyp, 5 jylǵa bas bostandyǵynan aıyryldy. Jazany óteý merzimi 2017 jylǵy 20 sáýirge belgilendi.

Eske salaıyq, tergeý barysynda aıyptalýshy VKontakte áleýmettik jelisine tirkelip, uzaq ýaqyt ekstremıstik nasıhat jumystaryn júrgizgen. Ol qasıetti musylmandar soǵysyna qatysýǵa, ekstremıstik toptarǵa qoldaý kórsetýge shaqyratyn materıaldar salyp otyrypty. Taıaý Shyǵys pen Sırııada jıhad jasaýǵa úgittegen. Onyń ákesi de osyndaı zańǵa qaıshy áreketi úshin jazasyn óteýde eken.