OQO-da aldaǵy jyly 13,8 myń gektar sýarmaly jer aınalymǵa qosylady
ShYMKENT. QazAqparat - Ońtústik Qazaqstan oblysy aldaǵy jyly negizgi 4 baǵytta damıtyn bolady. Olar: óndiris, egistik, mal sharýashylyǵy jáne týrızm salasy. Osy atalǵan 4 salany damytýda aýdan, qala ákimderi men jaýapty sala basshylary jumystaryn jandandyrýy kerek. Búgin bul týraly oblystyq ákimdikte ótken selektorlyq jıynda Ońtústik Qazaqstan oblysynyń ákimi Janseıit Túımebaev málim etti.
Kúntártibindegi «Kúzgi jıyn terim jumystarynyń aıaqtalýy jáne aýyl sharýashylyǵy salasy boıynsha 2017 jylǵa belgilengen ındıkatorlarǵa qol jetkizý týraly» oblystyq aýyl sharýashylyǵy basqarmasynyń basshysy Serik Turbekov baıandama jasady. Onyń aıtýynsha, bıyl óńirde egistik kólemi 29 myń 300 gektarǵa artqanymen, jalpy dándi daqyldar boıynsha ónim alý 1 gektardan 24,3 tsentnerden 22,8 tsentnerge kemigen. Sondaı-aq, bıyl maqta alqabynyń da kólemi 25 myń gektarǵa artyq egilgenimen, ótken jyldan ár gektardan ónim alý 2,6 tsentnerge azaıǵan. Mamandar munyń sebebin egistik kóleminiń artyp, zııankesterdiń kóbeıip ketýimen baılanystyrady.
«Bıyl maqtadan bólek, masaqty daqyldardyń túsimi men alynǵan ónimi byltyrǵy jylmen salystyrǵanda azaıǵanyn baıqap otyrmyz. Mysaly, 2016 jyly ár gektardan 20,2 tsentner masaqty dándi daqyldary alynǵan bolsa, bıyl ár gektardan 18,3 tsentner ónim alyndy. Maqtaral, Sozaq aýdandary jáne Túrkistan, Kentaý qalalarynan basqa barlyq aýdandarda ónim alý kórsetkishteri azaıyp otyr», - dedi Serik Ordabekuly.
Bıyl ońtústik kókónis pen baqsha ónimderi óndirýde jaqsy kórsetkishterge qol jetkizgen. Jańa baǵyt retinde jańǵaq pen badamsha egý jumystary da qarqyn alyp keledi. Aldaǵy jyly aýyl sharýashylyǵy daqyldary 7 myń gektarǵa artyp, 825 myń gektarǵa jetedi degen boljam bar. Onyń ishinde qarqyndy baýlar 804 gektarǵa, jańǵaq sharýashylyǵy qosymsha 500 gektarǵa egiledi dep josparlanýda. Aldaǵy josparlardy búginnen bastap pysyqtaýdy eskertken óńir basshysy egistik kólemin arttyryp qana qoımaı, ónim sapasy men kólemin ulǵaıtýǵa da mán berýdi tapsyrdy.
«Aldaǵy kóktemgi egin egý jumystaryna kirispes buryn aýdan, qala ákimderi, salaǵa jaýapty mamandar tıimdiligi mol daqyldardy egý jumystaryna saraptama jasaýy tıis. Bul áreket aýyl sharýashylyǵyndaǵy egistik jer men aǵyn sýdy meılinshe únemdeýge múmkindik beredi. Maqta salasyna da jańa tehnologııalardy engizý máselesine den qoıýdy tapsyramyn», - dedi Janseıit Qanseıituly.
Aldaǵy jyly oblysta 220 gektarǵa jylyjaılar salynyp, jalpy kólemi 1 514 gektarǵa jetkizilmek. Sondaı-aq, 13,8 myń gektar sýarmaly jer jańadan aınalymǵa qosylatyn bolady. Al, tamshylatyp sýrarý ádisi 8,1 myń gektarǵa engizilip, jalpy kólemi 66, 6 myń gektarǵa ulǵaımaq.
OQO ákiminiń baspasóz qyzmeti
