OQO-da aldaǵy 3 jylda 84 eldi meken ortalyqtandyrylǵan aýyz sýmen qamtylady

Sonda «Óńirlerdi damytýdyń 2020 jylǵa deıingi» baǵdarlamasynda eldi mekenderdi ortalyqtandyrylǵan aýyz sý jáne sý burý júıelerimen qamtýdyń naqty kórsetkishterin tolyǵymen oryndaǵan bolamyz. Búgin Ońtústik Qazaqstan oblysynyń ákimi J.Túımebaev selektorlyq jıynda osylaı málim etti, dep habarlaıdy óńir basshysynyń baspasóz qyzmeti.

Oblys ákimi jalpy óńirde ortalyqtandyrylǵan aýyz sý júıesine qosylmaǵan 200-den astam aýyl bar ekenin aıta kele, jıynda baıandama jasaǵan oblystyq energetıka jáne turǵyn-úı kommýnaldyq sharýashylyq basqarmasynyń basshysy M.Maraıymǵa birqatar tapsyrmalar júktedi.

«Búginde oblys halqynyń 12 paıyzy, ıaǵnı shamamen 200 myńǵa tarta turǵyny ortalyqtandyrylǵan aýyz sý júıesine qosylmaǵan. Osy baǵyttaǵy jumystardy júıelendirýmiz kerek. Baǵdarlama talaptaryna sáıkes, eldi mekenderde qurylys jumystaryn júrgizý úshin, birinshi kezekte jer asty sý qorlaryna geologııalyq izdeý-barlaý jumystaryn júrgizý qajet. Osy jumystardyń qorytyndysy negizinde qurylys júrgizý úshin jobalaý-smetalyq qujattaryn ázirleý kerek», - Janseıit Qanseıituly.

Basqarma basshysy osy baǵytta, 2016-2018 jyldary halyq sanynyń basymdyǵyna qaraı 117 eldi mekenniń jobalaý-smetalyq qujattary ázirlenin jetkizdi. Oblystyń damý josparyna sáıkes, aldaǵy 3 jylda 84 eldi mekendi ortalyqtandyrylǵan aýyz sýmen qamtý josparlanyp otyr. 2018 jyly aýyz sý salasyna 11,0 mlrd teńge bólinip, 76 nysannyń qurylysy iske asyrylýda. Onyń ishinde, 20 nysan aǵymdaǵy jyly paıdalanýǵa berilse, 56 nysannyń qurylysy 2019 jylǵa ótpeli. Sonymen qatar basqarma basshysy jyl sońyna deıin 13 eldi meken aýyz júıelerimen qamtylsa, 2 eldi mekenniń tozyǵy jetken sý qubyrlary qaıta jańartylyp, 2 móltekaýdanda jáne 4 sýaǵarlar qurylysy aıaqtalatynyn aıtty.

Jıyndy qorytyndylaǵan oblys ákimi basqarma basshysyna ózge aımaqtarmen salystyrǵanda halqty aýyz sýmen qamtý deńgeıi qandaı ekenin anyqtaýdy jáne atalǵan salaǵa avtomattandyrý júıesin engizýdi tapsyrdy.