OQO-da alaıaqtardyń sýreti qoǵamdyq oryndarǵa ilindi
ShYMKENT. QazAqparat - Elimizde bes jylda alaıaqtyq 20,2 protsentke ósse, Ońtústik Qazaqstanda bul kórsetkish eki esege deıin artyp ketken. Osyny eskergen óńirdiń prokýrorlary qylmystyń osy túrimen aınalysatyndardy qatań baqylaýǵa alyp, «Alaıaqsyz qoǵam» jobasyn júzege asyrýda, dep habarlaıdy QazAqparat HAA tilshisi.
Atalǵan jobanyń oryndalýyna ishki ister organdary men turǵyn úı sektory, halyqqa qyzmet kórsetý ortalyqtarynyń mamandary da jumyldyrylǵan. Prokýrorlar birlesip atqarǵan jumystardyń arqasynda alaıaqtyq qylmysy 36 paıyzǵa tómendegenin aıtady.
«2010 jyly alaıaqtyq qylmys 529 bolyp tirkelgen bolsa, 2015 jyly bul kórsetkish 5600-ge ósip ketti. Osy jobanyń aıasynda qylmys azaıdy. Tipti, keıingi kezderi tirkelmedi deýge de bolady. Sotty bolǵan azamattardyń sýretin qoǵamdyq oryndarǵa ilip, halyqqa qulaqtandyrý jumystaryn júrgizdik», - deıdi oblys prokýrorynyń orynbasary Ábil Qojahmetov.
Quzyrly organ ókilderi jurtty aldap soǵatyndardyń kóbi áıelder ekenin aıtady. Olar negizinen aldanǵandardyń áleýmettik jaǵdaılaryn túzep berýge, jumysqa ornalastyrýǵa, kezekten tys turǵyn úı men jer áperemin dep aqshalaryn alyp kelgen. Kóp jaǵdaıda, alaıaqtardyń quryǵyna túsetinder de názikjandylar eken.
«Bir adamnyń ózi 50 adamnan aldap aqsha alyp, sazǵa otyrǵyzyp ketken. Al, qylmysqa barǵandardyń kóbi - 84 paıyzy jumyssyzdar. Olardyń ishinde joǵary bilimi bar azamattar da bar. Ýádeni úıip tógip, aqshalaryn alyp alǵan da, qashyp ketip otyrǵan»,- deıdi Á.Qojahmetov.
