OQO-da AQSh prezıdentiniń attasy kishkentaı Donald turady
ShYMKENT. QazAqparat - Ońtústik Qazaqstan oblysynda AQSh prezıdentiniń attasy kishkentaı Donald turady. Ótken jyldyń qarasha aıynda Qazyǵurt aýdany Kókibel aýylynda týylǵan səbıge bul esimdi atasy Kədirbaı qoıypty, dep habarlaıdy QazAqparat HAA tilshisi.
Kádirbaı Jarqynbekovtyń sózinshe, úshinshi nemeresiniń atyn ótken jylǵy saılaýda jeńiske jetken Amerıka Qurama Shtattarynyń prezıdenti Donald Tramptyń qurmetine oraı qoıǵan.
«Men ózim ınjener-geolog, sáýletshimin. Degenmen saıasatqa qatty qyzyǵamyn. Ulym Shyńǵystyń úshinshi uly ómirge kelgende AQSh-ta saılaý ótken bolatyn. Amerıka sııaqty alyp memlekette saıası tartys bolyp, aqyr sońynda Donald Tramp atty mıllıoner jeńiske jetti. Bul toǵyzynshy qarasha bolatyn. Nemerem eki kúnnen keıin, ıaǵnı 11-shi qarashada dúnıege keldi. Sol kúni esimin Donald dep qoıdym. Qazaqstanda da Donald Tramp sııaqty myqty, baı ári beıbitshilikti ustanatyn azamat bolsyn, eki el arasynda tatýlyq ornasyn degen nıetpen. Bir aıta keterligi, balamyz shashy qalyń bolyp týyldy attasy sııaqty»,-deıdi Kádirbaı Jarqynbekov.
Osydan keıin Donaldtiń ákesi atasynyń aıtýymen AQSh-tyń Qazaqstandaǵy elshiligine hat jibergen. Onda Donald Tramptyń attasy Qazaqstanda ómirge kelgeni týraly súıinshi habar aıtylǵan. Dese de elshilik áli qandaı da bir jaýap bermepti. Búginde alty aıdan asqan sábıdiń ájesi Raıhan apaı bolsa nemeresiniń ózgeshe esimin aýyldastarymyz estigende tańqalyp jatty,- deıdi.
«Kelinim Nazgúl úsh ul bosandy. Barlyǵynyń esimderin atasy qoıdy. Úshinshisi ómirge kelgende bárimiz Donald degen esimge qarsy boldyq, qazaqsha esim bere salaıyq dep. Alaıda atasy kónbedi. Balam óskende Donald Tramp sııaqty baı, aýqatty adam bolady dep. Úlken azamat bolǵanda odan barlyqtaryń aqsha suraısyńdar dep ázildeıdi. Búginde Donaldtyń Hanbatyr men Bereke esimdi aǵalary ósip keledi. Olardyń Donald deýge tili kele bermeıdi. Dondı Tramp deıdi. Aýyldaǵylar bolsa prezıdent nemereńiz dep aıtady. Emhanadaǵylar atyn jaqsy bilip alǵan. Qazir báriniń de qulaǵy úırenip qaldy»,-deıdi ájesi Raıhan Jarqynbekova.
