OQO-da Agroónerkásiptik keshendi damytýdyń 5 jyldyq josparyn júzege asyrý talqylandy
ASTANA. ÓazAqparat - Ońtústik Qazaqstan oblysynyń ákimi J.Túımebaev QR Aýyl sharýashylyǵy mınıstrligine qarasty «Ulttyq agrarlyq ǵylymı-bilim berý ortalyǵy» KEAQ basqarma tóraǵasy Asqar Nametovty qabyldady, dep habarlaıdy ákimdiktiń baspasóz qyzmeti.
Kezdesýde Asqar Nametov QR Úkimetimen bekitilgen Agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasynyń iske asý jaıyn áńgimeledi.
Atalǵan baǵdarlamanyń maqsaty - aýyl sharýashylyǵyndaǵy eńbek ónimdiligin arttyrý jáne sol arqyly el ekonomıkasyn turaqty damytý men básekege qabiletti ónimmen qamtamasyz etý.
Baǵdarlamany júzege asyrýda birqatar mindetter qoıylǵan. Atap aıtqanda 500 myńnan astam jeke qosalqy jáne usaq fermer sharýashylyǵy úshin aýyl sharýashylyǵy kooperatsııasyn qurý, mal sharýashylyǵy tıimdiligin 40%-ǵa, ósimdik sharýashylyǵy tıimdiligin 30%-ǵa arttyrý, qaıta óńdeý úlesin jáne kásiporyndar júktemesin 1,3 esege ulǵaıtý aldaǵy 5 jyldyń josparly mejesine kirip otyr.
Sonymen qatar, Basqarma tóraǵasy aýyl sharýashylyǵyn damytý boıynsha jasalǵan baǵdarlamanyń Ońtústik Qazaqstan oblysynda júzege asýyn agrarly ǵylym salasymen birlese otyryp iske asyrýdy usyndy.
Óz kezeginde, aımaq basshysy agrarly aımaq úshin bul baǵdarlamanyń óte mańyzdy ekenin aıtyp, aıtylǵan usynysty quptady.
Sondaı-aq, ákim Ulttyq agrarlyq ǵylymı-bilim berý ortalyǵynyń ǵalymdaryn mal sharýashylyǵyn damytý jáne maqta ónimdiligin arttyrý men sý máselesin sheshý boıynsha arnaıy baǵdarlama ázirleý úshin oblystyq aýyl sharýashylyǵy basqarmasynyń mamandarymen birlese jumys isteýge shaqyrdy.
