OQO-da agroónerkásipti qoldaý jaıy talqylandy
ASTANA. QazAqparat - Ońtústik Qazaqstan oblysy ákimdiginde oblys prokýratýrasynyń keńeıtilgen alqa májilisi ótti. Onda Qazyǵurt aýdanyndaǵy «Agroónerkásiptik keshenin damytý» memlekettik baǵdarlamasynyń iske asyrylý men áleýmettik-ekonomıkalyq kórsetkishteriniń shynaıylyǵyna júrgizilgen tekserýlerdiń qorytyndysy talqylandy, dep habarlaıdy oblys ákiminiń baspasóz qyzmeti.
Alqa májilisine oblys ákimi J. Túımebaev pen orynbasarlary, oblystyq basqarma basshylary, qala, aýdan ákimderi, oblystyq máslıhat depýtattary, memlekettik kirister organdary men basqa da ýákiletti jáne quqyq qorǵaý organdarynyń basshylary qatysty.
Alqa májilisinde baıandama jasaǵan oblystyq prokýratýranyń birinshi basqarma basshysy Rústem Dúısenbaev otyrǵandardyń nazaryn aýyl sharýashylyq keshenin damytý baǵdarlamasynyń tıimdiligine keri áser etken sýbsıdııa bólý protsedýralarynyń buzýshylyqtaryna aýdardy. Sondaı-aq ol sharýalarǵa jasalǵan ákimshilik kedergiler men áýre-sarsańǵa salý, qajettilikti durys qalyptastyrmaý jáne bıýdjet qarjysyn tıimsiz jaratý máselelerine toqtaldy.
«Aýyl sharýashylyǵyn sýbsıdııalaý máselesi boıynsha prokýrorlarmen somasy 1,7 mlrd teńgeni quraıtyn myńnan astam zańbuzýshylyqtar anyqtalyp, 26 derek boıynsha sotqa deıingi tergeý bastaldy. Budan bólek, memlekettiń qomaqty járdemine qaramastan jumyssyzdyqpen kúres tásilderi retinde agroónerkásipti qoldaýdyń quraldary tıisti dárejede paıdalanbaýda. Qazyǵurt aýdanynda qylmys sanynyń 7 paıyzǵa óskendigi jáne qylmys jasaǵan tulǵalardyń 63 paıyzy jumyssyz ekeni anyqtalyp otyr», - dedi Rústem Tileshuly.
Budan bólek, tekserý nátıjesinde 200 myńnan astam zańbuzýshylyqtar anyqtalyp, onyń ishinde 3,5 myńy kásipkerliktiń damýyna keri septigin tıgizetin ákimshilik kedergiler, 400 mln teńgeden astam bıýdjet qarjysyn tıimsiz jaratý derekteri áshkerelengen. Sondaı-aq salyq óndirý isinde de kemshilikterge jol berilgeni anyqtalǵan.
Aıta keteıik, bul prokýrorlyq keshendi tekserý sharasy elimizde pılottyq joba retinde QR Bas prokýrorynyń buıryǵymen júrgizilip otyr. Aldaǵy ýaqytta ózge aýdan-qalalarda da jalǵasyn tabatyn bolady.
«Elbasymyz ońtústikke jasaǵan jumys sapary barysynda oblysymyzdy 80 paıyz dotatsııada otyr dep atap ketti. Jasyratyny joq, óńirde jumyssyzdyqpen kúres, kásipkerlerge qoldaý bildirý, salyq túsimderin molaıtý, týrızmdi damytý, óńirge ınvestıtsııa salý, sharýalarǵa sýbsıdııa bólý, aýyl sharýashylyǵy keshenin damytý maqsatynda qyrýar jumystar atqarylyp jatyr. Alaıda keıbir aýdandarda bul jumystar qojyrap, aýdan ákimderiniń jumystarynda júıesizdik bar ekenin baıqap otyrmyz. Aldaǵy ýaqytta barlyq aýdan -qala ákimderiniń jumysy jiti qadaǵalaýda bolady», - dedi Janseıit Qanseıituly.
Alqa otyrysynyń qorytyndysymen jergilikti atqarýshy jáne ýákiletti organdarǵa memlekettik baǵdarlamalardy, sonyń ishinde agroónerkásip keshin damytý baǵdarlamasyn tıisti dárejede iske asyrmaýdyń sebep-saldaryn joıýǵa baǵyttalǵan usynymdar berildi.
