OQO-da adam ólimine baılanysty qylmystyq is qozǵaldy
ASTANA. QazAqparat - Ońtústik Qazaqstan oblysynda adam ólimine baılanysty qylmystyq is qozǵaldy, dep habarlaıdy OQO ІІD-niń baspasóz qyzmeti.
«2015 jyldyń 4 aqpanyna qaraǵan túni Ońtústik Qazaqstan oblysyndaǵy Saryaǵash aýdanynyń Bostandyq kentine jaqyn jerde, kórshiles Yntymaq aýylynyń turǵyny, 1985 jylǵy B.D.Artyqovtyń pyshaqtalǵan múrdesi tabyldy.
Adam óltirý faktisi boıynsha qylmystyq is qozǵaldy.
Qoldanylǵan sharalardyń nátıjesinde atalǵan qylmysty jasaýda kúdikti tanylǵan Saryaǵash aýdanyndaǵy Bostandyq kentiniń turǵyny, 1976 jylǵy N.K.Narmetov qazirgi kezde izdelýde.
Qolda bar málimetter boıynsha, qylmys turmystyq sıpatta jasalǵan. Oǵan N.Narmetovtyń B.Artyqovtyń ıeligindegi jylyjaıdy jalǵa alýmen baılanysty ózara túsinispeýshilikter sebep bolǵan.
5 aqpan kúni keshke B.Artyqovtyń aýyldastary - bir top jastar N.Narmetov turatyn jerde jappaı bassyzdyq ornatyp, sonyń saldarynan birneshe kólik órtenip, aýdarylǵan. Jaqyn turǵan úılerge de zııan keltirildi.
Buzaqylyq áreketterdi oqıǵa ornyna shuǵyl jetken polıtsııa qyzmetkerleri toqtatty. Qaza tapqandar men zardap shekkender joq.
Oqıǵa ornyna quqyq tártibiniń qosymsha kúshteri jiberildi. Qazirgi kezde jaǵdaı turaqtaldy.
B.Artyqovtyń ólimi jáne odan keıin oryn alǵan quqyqqa qarsy áreketterdiń tergelýi erekshe baqylaýǵa alyndy.
