OQO-da 95 myń gektar jerge maqta egiledi
ShYMKENT. QazAqparat - Ońtústik Qazaqstan oblysynyń Maqtaral aýdanynda bıyl 95 myń gektar jerge aq altyn dáni sebiledi. Ol úshin aýdanda 3 myń tonna tuqymdyq shıt daıyndalyp, tehnıkalar saqadaı saı tur. Bul týraly Qazybek bı aýyldyq okrýginde kótemgi egis naýqanyna daıyndyqty pysyqtaý maqsatynda ótken semınar-keńeste aıtyldy, dep habarlaıdy QazAqparat tilshisi.
Aýdan ákimi Jamantaı Beısenbaevtyń bastamasymen ótken sharaǵa 400-ge jýyq sharýa qojalyq ókilderi, maqta qabyldaý zaýyttarynyń, nesıelik uıymdar men ǵylymı-zertteý ınstıtýttarynyń basshylary qatysyp, ózara tájirıbe almasty. Jıynda aýdan basshysy bıylǵy jyly agroónerkásip keshenin damytýdyń negizgi 5 baǵytyn aıqyndap berdi.
«Birinshi, aýdandaǵy aýyl sharýashylyǵy taýar óndirýshilerin qoljetimdi nesıe qarjylarmen qamtamamsyz etý. Ekinshi, aýyl sharýashylyǵy kooperatıvteri men mashına-traktorlyq stantsııalar júıesin jetildirý, aýdanymyzda óndirilgen aýyl sharýashylyǵy ónimderiniń eksporttyq áleýetin arttyrý. Úshinshi, aýdanymyzdaǵy sýarmaly jerlerdiń kólemin ulǵaıtý, sý júıeleriniń sý ótkizgishtik qabiletin jaqsartý is-sharalaryn atqarý. Onyń ishinde damý bankteriniń qarjylary men jeke ınvestorlardy paıdalanyp, ırrıgatsııalyq júıelerdi qaıta qura otyryp, sýarmaly alqaptardy aǵyn sýmen qamtamasyz etý kózdelýde»,- dedi Jamantaı Beısenbaev.
Ákim sondaı-aq, aýyl sharýashylyǵy kooperatıvterin quryp, modýldi sút qabyldaý beketterin, mal bordaqylaý alańdaryn ashý josparlanyp otyrǵanyn atap ótti. Aldaǵy jyldary aýdannan aýyl sharýashylyǵy taýarlaryn sharýalardan arzan baǵada satyp alyp, saqtaý úshin qoıma salý ári aýyl sharýashylyǵy ónimderin ózge aýdandar men oblystarǵa tasymaldaý arqyly saýdalaý kózdelýde ekenin jetkizdi. Ol úshin aýdanda ırrıgatsııalyq júıelerdi qaıta qura otyryp, sýarmaly alqaptardy aǵyn sýmen qamtamasyz etý jumystary jasalýda.
Sonymen qatar, sýarmaly jerlerdiń melıoratıvtik jaǵdaıyn jaqsartý úshin kollektor-drenaj júıelerin jóndeý jáne tik drenajdy uńǵymalardy qalpyna keltirý, jańa jer ıgerý jumystaryn júrgizý qolǵa alynbaqshy.
Osy túıtkilderdi tilge tıek etken aýdan basshysy Jamantaı Beısenbaev aldaǵy bir jylda óńirden aýyl sharýashylyǵy salasyndaǵy negizgi kúshke aınalatyn kooperatıvterdiń qatary artatynyn alǵa tartty.
