OQO-da 800-den astam sottalýshy turaqty jumyspen qamtyldy
ShYMKENT. QazAqparat - Ońtústik Qazaqstan oblysynda 807 sottalýshy turaqty jumyspen qamtyldy. Bul kórsetkish kúngeıdegi jazasyn óteýshilerdiń 77,5 paıyzyn qurap, respýblıka boıynsha ekinshi orynǵa turaqtady, dep habarlaıdy QazAqparat HAA tilshisi.
Óńirdiń prokýrorlary bas bostandyǵynan aıyrylǵan azamattardy jumyspen qamtý maqsatynda kásipkerlerdi tartyp, birlesip jumys júrgizýde. Búgin oblys aýmaǵyndaǵy alty túrmede kishigirim tsehtar men naýbaıhanalar, óndiris oryndary ashylǵan.
«Bizde qazir 17 kásipker túzeý mekemelerine kirip, ózderiniń tsehtaryn ashyp, jazalaryn ótep jatqan azamattarǵa jumys berip, kásipterin júrgizip jatyr. Kásipkerlerge mundaı jerde jumys isteý óte tıimdi. Mysaly, ondaǵy tsehtardy jalǵa alý tegin. Ekinshiden, jumys ornynda PTÝ bar bizde, árbir mamandyqtarǵa úıretýge múmkinshilikteri bar. Eger kásipkerler kelemiz dese, ózderiniń zattaryn ákelip, buıymdaryn jasata beredi. Olardan aqysyn tóleý ǵana suralady», - deıdi oblystyq prokýratýranyń basqarma bastyǵy Ermek Áıtimov.
Temir torǵa toǵytylǵandar elektr monteri, gaz-elektr dánekerleýshi, tiginshi-ámbebap, avtomehanık, tokar-ámbebap jáne aǵash ustasy sııaqty mamandyqtardy meńgerýde. Túrme qyzmetkerleriniń aıtýynsha jazasyn óteýshilerdiń qolynan shyqqan dúnıeler áp-sátte satylyp ketedi. Sebebi, buıymdardyń baǵasy arzan, sapasy da jaqsy. Qoldan jasalǵan buıymdar qashan da naryqta óz baǵasyn joǵaltpaıtyny belgili. Turmysta qajetti bul dúnıelerdi saýdaǵa shyǵarý kásipkerler úshin de kóp paıdasyn tıgizip otyr. «Ressolızatsııa: Sen qoǵamǵa kereksiń» jobasynyń aıasynda óńirdiń prokýrorlary bıylǵy jyly birqatar túzeý mekemelerinde oqytý ortalyqtaryn ashqan. Onda sottalǵandar jeńil ónerkásip salasy boıynsha mamandyqtardy meńgerip otyr. Al, jazasyn ótep shyqqandardy turaqty jumyspen qamtý úshin probatsııa baǵdarlamasymen qoldaý kórsetilýde. Aıta keteıik, ótken jyly óńirde 60 adam osy baǵdarlamamen bilimin jetildirip, kásip meńgergen bolatyn.
