OQO-da 80-ge jýyq naýqastyń búıregi aýystyryldy
ShYMKENT. QazAqparat - Búgingi tańda Ońtústik Qazaqstan oblysynda 80-ge jýyq naýqastyń búıregi aýystyrylyp, 8 naýqastyń baýyryna transplantatsııa jasaldy, dep habarlaıdy oblys ákimdiginiń baspasóz qyzmeti.
Shırek ǵasyr ishinde elimizdiń densaýlyq saqtaý salasynda da úlken serpilis jasaldy. Ásirese, úshinshi megapolıs sanalatyn Ońtústik Qazaqstan óńiriniń medıtsınasy da aıtarlyqtaı tabystarǵa jetti. Atap aıtqanda, Shymkent qalalyq jedel medıtsınalyq kómek kórsetý aýrýhanasy respýblıkadaǵy aımaqtar arasynda tuńǵysh ret adam aǵzasyn transplantatsııalaý baǵdarlamasyn sátti ıgerdi. Jergilikti dárigerler Ońtústik Koreıa, Reseı Federatsııasy, Belarýs, Túrkııa memleketterimen tyǵyz iskerlik baılanysta bolyp, alys jáne jaqyn shetelderde oqyp, bilimderin jetildirdi. Al, bilikti mamandar Shymkentte sheberlik synyptaryn ótkizip, ózderiniń baı tájirıbelerimen bólisti. Atalmysh aýrýhananyń materıaldyq-tehnıkalyq bazasy zamanaýı qural-jabdyqtarmen tolyqty. Dıagnostıkalaýdyń, ota jasaýdyń jáne emdeýdiń ozyq tehnologııalarymen qarýlanǵan bizdiń dárigerler naýqastardyń aǵzalaryn aýystyrý sııaqty kúrdeli operatsııalar jasaýǵa mashyqtanyp, transplantatsııalaý isin meńgere bastady. Óńir medıtsınasy syrqattyń soqyrishegine ota jasaýdan aǵza múshelerin aýystyrýǵa deıingi kúrdeli kezeńderden súrinbeı ótip keledi. Qol jetken tabys olar úshin shek emes. Búgingi tańda 80-ge jýyq naýqastyń búıregi aýystyrylyp, 8 naýqastyń baýyryna transplantatsııa jasaldy. Kezekte turǵandar áli kóp.
