OQO-da 8 iri aýyl sharýashylyq jobasy júzege asyrylýda
ASTANA. QazAqparat - Ońtústik Qazaqstan oblysynda shıkizat sektorynan daıyn ónim sektoryna ótý baǵytynda 8 iri ınvestıtsııalyq jobalar júzege asyrylýda, dep habarlaıdy oblys ákiminiń baspasóz qyzmeti.
Bul týraly búgin Óńirlik kommýnıkatsııa qyzmetinde ótken brıfıngte oblystyq aýyl sharýashylyǵy basqarmasy basshysy Serik Turbekov málim etti.
Onyń aıtýynsha, oblysta ınvestıtsııa sommasy 18,5 mlrd teńgeni quraıtyn, qýattylyǵy jylyna 30 myń tonna qus etin óndiretin «AK Kazyna» JShS-nyń jobasyn iske asyrý jumystary bastalǵan. Al, «Ordabasy-Qus» JShS kúrketaýyq etin óndirý óńdeý óndiristik qýattylyǵyn jylyna 25 myń tonnaǵa jetkizý boıynsha kelisimge qol qoıǵan. Munan bólek, Shardara aýdanynda balyq ónimderin qaıta óńdeıtin eki zaýytty iske asyrý jumystary júrgizilse, ınvestıtsııa sommasy 7,8 mlrd teńge quraıtyn túıe sútin qaıta óńdeıtin zaýyt salý jumystary bastalǵan.
Sondaı-aq, Qytaı ınvestorlarymen ınvestıtsııa sommasy 21,6 mlrd teńge quraıtyn tomat zaýytyn salý jobasy kelisilse, 1 myń ga aýmaqqa qarqyndy jańǵaq baýyn otyrǵyzý jobasyn júzege asyrý ınvestorlar tarapynan kelisimin tapty. Atalǵan joba boıynsha jerdi tańdap, qujattardy rásimdeý jumystary júrgizilýde. Budan basqa, birneshe ınvestorlardyń qatysýymen ınvestıtsııa sommasy 51,2 mlrd teńge quraıtyn 136 ga aýmaqta Shymkent q. óndiristik jylyjaılar salý jobasyn («Teplıchnyı raı») júzege asyrý josparlanýda. Al, Qazyǵurt aýdanynda «Asyl bastaý» JShS ınvestıtsııa sommasy 603 mln teńge quraıtyn qurǵaq sút jáne sary maı shyǵarý zaýyty salynýda.
«Memleket basshysy jyl saıynǵy Qazaqstan halqyna arnalǵan Joldaýynda eldiń agrarlyq salasyna asa basymdylyq berip, jyldan-jylǵa sala qarqyndy damý ústinde. Oǵan dálel, ótken jyly aýyl sharýashylyǵy jalpy ónim kólemi 480,4 mlrd teńge, naqty kólem ındeksi 105 % qurady. Sońǵy bes jylda shamamen 2 esege ulǵaıdy. Jalpy ónimniń Respýblıkadaǵy shaqqandaǵy úlesi 13% qurady. Bul oblystyń agrarlyq salasynyń eksporttyq jáne aldaǵy ýaqytta Respýblıka halqyn negizgi azyq-túlik ónimderimen qamtamasyz etetin Ortalyqqa aınaldyrý áleýetiniń joǵarǵy ekendigin kórsetedi», - dedi basqarma basshysy.
Elbasy Joldaýynda «Agrarlyq sektor ekonomıkanyń jańa draıverine aınalý kerek» dep, aýyl sharýashylyǵy salasyna úlken mindetter júktedi.
Osy Joldaýda belgilengen mindetter boıynsha atqarylyp jatqan jumystarǵa jeke-jeke toqtalǵan Serik Turbekov 2021 jylǵa deıin agroónerkásip kesheni eksportynyń kólemi 35 %-ǵa, 90 myńnan astam jeke fermerlik sharýashylyqtardy biriktiretin 600-den astam kooperatıvter qurý jáne 118,8 myń sýarmaly jerlerdi qalpyna keltirý jumystary júrgizilip jatqanyn atap ótti.
