OQO-da 74 myńnan astam stýdent kásiptik bilim alady
ShYMKENT. QazAqparat - Ońtústik Qazaqstan oblysynda tehnıkalyq jáne kásiptik bilim berý uıymdarynda 74 myńnan astam 176 stýdent bilim alady. Byltyrǵy oqý jylymen salystyrǵanda memlekettik tapsyryspen oqıtyndardyń sany 5,4 paıyzǵa artqan. Bul týraly óńirlik kommýnıkatsııalar qyzmeti uıymdastyrǵan kóshpeli brıfıng barysynda málim boldy, dep habarlaıdy QazAqparat tilshisi.
Óńirde kásiptik bilim beretin júzge jýyq oqý orny bar. Osyndaı oblys ortalyǵyndaǵy irgeli oqý oryndarynyń biri №5 kolledj jumysymen jýrnalıster tanysyp qaıtty. 1941 jyldan beri maman daıarlap keletin bilim ordasy tiginshi, modeler, tehnık-tehnolog, toqýshy syndy mamandyq ıelerin daıyndaýda. Oqý orny búginde jeńil ónerkásip mamandaryn daıyndaıtyn oqý ortalyǵyna aınalǵan.
«Qazir 814 bilim alýshymyz bar. 19 oqý kabıneti men 9 oqý-óndiristik sheberhanamyz jumys isteıdi. Shtattyq kestege sáıkes ujymda 77 pedagog jumys jasaıdy. Onyń 38-den astamy joǵary jáne birinshi sanattaǵy oqytýshylar. Sondaı-aq, OQO Kásipkerler palatasymen birlesip dýaldy oqytý júıesi negizinde oblystaǵy jeńil ónerkásip salasyndaǵy iri 21 kásiporynmen 4 jaqty kelisimshart jasalynǵan. Sonyń nátıjesinde bitirýshi túlekterimiz 100 paıyz jumysqa ornalasady», - deıdi kolledj dırektory Gúlmıra Taǵaeva.
Oqý orny oblystaǵy birqatar tigin fabrıkalarymen óndiris oryndaryna mamandar daıarlap keledi. Osy kolledjde jastar «Órleý» baǵdalamasy boıynsha qysqa merzimde bilim alady. 
Jylpy óńirde «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda qysqa merzimdi kýrstar boıynsha 12 myńnan astam adam 87 túrli mamandyq boıynsha bilim berý uıymdaryna oqýǵa joldanyp, onyń 30 paıyzdan astamy jumysqa ornalasqan.
