OQO-da 700 myńnan astam adam turaqty túrde sportpen shuǵyldanady
ShYMKENT. QazAqparat - Ońtústik Qazaqstan oblysynda 700 myńnan astam adam turaqty túrde sportpen shuǵyldanady. Bul týraly búgin Aımaqtyq kommýnıkatsııalar qyzmetinde ótken brıfıngte oblystyq Dene shynyqtyrý jáne sport basqarmasynyń basshysy N.Álibek málim etti.
Onyń aıtýynsha, buqaralyq sportty damytý maqsatynda byltyr oblys aýmaǵynda 4 849 túrli sporttyq is-sharalar ótkizilip, oǵan 550 myńnan astam adam qatyssa, onyń ishinde aýyldy jerlerde uıymdastyrylǵan 3 151 sporttyq sharaǵa 362 975 azamat qamtylǵan. Al, ótken jyldyń qorytyndysy boıynsha oblysta dene shynyqtyrý jáne sportpen turaqty túrde shuǵyldanýshylar sany 708 884 adamdy qurap, oblystaǵy barlyq jastaǵy halyqtyń qamtylýy 24,7 paıyzǵa jetip otyr. Aýa-raıy qolaıly, qysy jyly bolatyn óńirde sportpen shuǵyldanamyn degen azamattarǵa búginde barlyq jaǵdaı jasalýda.
Máselen, 2016 jyly qala, aýdandardaǵy eldi mekenderde demeýshiler esebinen 52 sport alańshalary salynyp, paıdalanýǵa berildi. Sondaı-aq, eldi mekenderde jergilikti bıýdjet, bıznestiń áleýmettik jaýapkershiligi aıasynda jáne «Jumyspen qamtý 2020» jol kartasy baǵdarlamasy aıasynda oblys kóleminde jalpy 116 sport alańshalary salyndy. Shardara aýdany men Túrkistan qalasynda sport keshenderi ashyldy. Al, Shymkent qalasynda barlyq sanattaǵy azamattarǵa dene shynyqtyrý jáne sportpen shuǵyldanýy úshin «Jeńis», «Táýelsizdik», saıabaqtary men «Nursát» shaǵyn aýdany men «Naýryz» alańynda 4 «Street Workout» sporttyq qozǵalysyna arnalǵan arnaıy alańshalar standartqa saı salynyp, halyq ıgiligine berilgen.
