OQO-da 700-ge jýyq búldirshin jańa balabaqshaǵa bardy
ASTANA. QazAqparat - Ońtústik Qazaqstan oblysy Sozaq aýdanyna qarasty Jýantóbe aýyldyq okrýginde 50 oryndyq «Alýa» balabaqshasy ashylyp, el ıgiligine berildi, dep habarlaıdy QazAqparat oblys ákimdiginiń baspasóz qyzmetine silteme jasap.
Bul osy jyly paıdalanýǵa berilgen 7-shi balabaqsha. Osylaısha «Balapan» baǵdarlamasy aıasynda ashylǵan balabaqshalarda 660 búldirshin balabaqshamen qamtylyp otyr. Nátıjesinde aýdanda baǵdarlamanyń oryndalýy 84,5 paıyzdy qurady. Aýyl turǵyndarynyń qýanyshymen bólise kelgen aýdan ákimi Maqsat Iseav balalar tárbıesi árqashan basty nazarda ekenine toqtalyp, búgingi urpaq - elimizdiń erteńi ekenin aıtty. Sondaı-aq, ol atalǵan nysan kásipkerdiń jeke ıeliginde bolsa da, memlekettik tapsyrys boıynsha jumys isteıtinin jetkizdi. Elý bala tárbıeletin mektepke deıingi bilim berý uıymynda jergilikti 10 adam jumyspen qamtylyp otyr. Sońǵy úlgidegi jabdyqtarmen qamtylǵan balabaqshada, eki jatyn bólme, ashana, demalys bólmesi, medbıke bólmesi bar. Aıta keteıik, Sozaqta jyl sońyna deıin «Balapan» baǵdarlamasy aıasynda taǵy 5 balabaqsha el ıgiligine beriledi dep josparlanýda. Osy ýaqytta birshamasynyń qurylys jumystary qarqyndy júrip, aıaqtalýǵa da jaqyn. Sońǵy jyldary jalpy oblys boıynsha balabaqshalar sany artyp, balalardyń balabaqshamen qamtylý deńgeıiniń kórsetkishteri de ózge aımaqtarǵa qaraǵanda kósh alda ekenin aıta ketken jón.
