OQO-da 7 jastaǵy bala toqqa túsip qaldy
ShYMKENT. QazAqparat - Ońtústik Qazaqstan oblysynda 7 jastaǵy bala toqqa túsip qaldy. Denesiniń 35 paıyzyn kúıik shalǵan jetkinshek shalǵaı aýdannan sanavıatsııanyń kómegimen oblys ortalyǵyna jetkizildi, dep habarlaıdy QazAqparat tilshisi.
Oqys jaǵdaı Saryaǵash aýdanynyń Qyzylásker aýylynda bolǵan. Asylbek esimdi jetkinshek oınap júrip, aýyl ishindegi qorshaýsyz turǵan transformatordyń ishine kirip ketken. Sóıtip balany joǵary voltti tok soǵyp qulaǵan. Ústindegi kıimderi órtenip, beti men basy, moıyny kúıgen. Eki qoly men aıaqtary da kúıikten qozǵalmaı qalypty. Jetkinshekti týystary alǵashynda aýdandyq aýrýhananyń jansaqtaý bólimine aparǵan. Alaıda onda emdeý qıyn bolǵandyqtan bala oblystyq balalar aýrýhanasyna jetkizildi. Dárigerler balanyń jaǵdaıyn aýyr dep baǵalap otyr.
«Balany 3-4 dárejeli kúıik shalǵan. Súıekke deıin teri bulshyq et sińirge deıin kúıip qalǵan, jaramaıdy. Onyń sol qoly jansyzdanyp qalǵandyqtan, ota jasaýǵa týra keledi»,-deıdi aýrýhananyń bas dárigeriniń orynbasary Bolat Nusqabaev.
Otbasynda jalǵyz bala qazir esin jıǵanymen, múgedek bolyp qalýy múmkin. Ata-anasy qorshaýsyz turǵan transformator birneshe jyldan beri jumys istep turǵanyn aıtady. Endi qojaıyny tabylmaı otyr eken. Polıtsııaǵa aryz túsirgen. Osylaısha transformator ıesin izdep taýyp sotqa bermekshi.
