OQO-da 7 mln memqyzmet elektrondy túrde kórsetilgen

ASTANA. QazAqparat - Ońtústik Qazaqstan oblysynda ústimizdegi jyldyń on aıynda 16 mln 400 myńnan astam qyzmet kórsetilse, sonyń 7 mıllıony elektrondy túrde usynylǵan. Bul týraly ákimdiktiń selektorlyq otyrysynda oblys ákiminiń apparat basshysynyń orynbasary Qanat Tólendıev málim etti. Qazirgi tańda oblystyq jergilikti atqarýshy organdar tarapynan 192 qyzmet túri kórsetiledi. Aǵymdaǵy jyldyń 10 aıynyń qorytyndysy boıynsha 7 027 180 qyzmet elektrondy túrde kórsetilgen.  Bul jalpy kórsetilgen qyzmetterdiń 42,8 paıyzyn quraıdy, dep habarlady óńir basshysynyń baspasóz qyzmetinen.  

«Kórsetilgen qyzmetterdiń 80 paıyzy densaýlyq saqtaý salasyna tıesili jáne osy saladaǵy qyzmetterdiń elektrondy úlesin arttyrý eleýli ózgeristerge ákeletini belgili», - Qanat Tólendıev.

Sońǵy 10 aıdyń qorytyndysy boıynsha Halyqqa qyzmet kórsetý ortalyqtary arqyly 541 816 elektrondy qoltańba berilgen. Alaıda elektrondy qyzmetterdiń úlesi áli de tómen. Sebebi qyzmet usynýshy memlekettik organdar tarapynan elektrondy qyzmetterdi alý joldary turǵyndarǵa óz deńgeıinde nasıhattalmaıdy. Budan bólek, aqparattyq júıeler arqyly kelgen ótinimderdi tirkemeı, tikeleı, memlekettik organnyń keńsesi arqyly kórsetý faktileri oryn alýda.

 

«Memlekettik qyzmetkerdiń jumysynda eń basty kórsetkish - halyqqa durys qyzmet kórsetý. Ekinshi - ýaqytynda ári qysqa merzimde qyzmet kórsetýge umtylýymyz qajet. Bul rette aýdan basshylary jumysyn kúsheıtýi tıis. Sizderdiń jumystaryńyzdyń ındıkatoryna bul da kiredi. Sondaı-aq, elektrondy túrde qyzmet kórsetý sapasyn jaqsartyp, shalǵaı aýyldardaǵy qyzmet túrlerin «Qazpochta» bólimsheleri arqyly jolǵa qoıýdy tapsyramyn», -  dedi Janseıit Qanseıituly.

«Damý» baǵdaralamasyn iske asyrý is-shara josparyna sáıkes elektrondy túrde kórsetiletin memlekettik qyzmetterdiń kórsetkishi áli de bolsa tómen. Atap aıtqanda, Báıdibek, Qazyǵurt, Sozaq, Saıram, Shardara aýdandarynyń kórsetkishteri kóńil kónshitpeıdi. Osy olqylyqtardy túzetý jóninde atalǵan aýdan basshylaryna oblys ákimi tarapynan naqty tapsyrmalar júkteldi.