OQO-da 6 myń jaýyngerdiń esimi jazylǵan eskertkish taqta ashyldy

ShYMKENT. QazAqparat - Ońtústik Qazaqstan oblysynda 6 myń  jaýyngerdiń esimi jazylǵan eskertkish taqta ashyldy. Memorıaldy taqta basynda soǵysta qaza tapqan sarbazdardy bir mınýt únsizdikpen eske alyp, quran baǵyshtaldy, dep habarlaıdy QazAqparat HAA tilshisi.

 Jeńistiń 72 jyldyǵynda sozaqtyqtar aýdan tarıhyn túgeldep, ataýsyz qalǵan arýaqtar aldyndaǵy boryshyn osylaısha atqardy. Saltanatty sharaǵa UOS ardagerleri men tájik-aýǵan soǵysyna qatysqan azamattar da qatysty. Jıynda aýdan ákimi Maqsat Isaev keıingi urpaqqa jeńis syılaǵan aqsaqaldarǵa qurmet kórsetip, syı-syıapattar tabys etti.

«Qazirgi tańda jyl saıyn qatary sırep bara jatqan UOS ardagerleriniń 6-aýy ǵana aramyzda bar. Biz barlyq ardagerlerdiń esimin jadymyzda qaldyrý úshin soǵysqa qatysqan azamattardy túgeldep, mereke qarsańynda 6000 adamnyń aty jazylǵan memorıaldy taqtany ashyp otyrmyz. Barlyqtaryńyzdy merekemen quttyqtaımyn. Aspanymyz ashyq, táýelsizdigimiz máńgilik bolsyn», - dedi aýdan ákimi.

Aıta keteıik, buǵan deıin Sozaq aýdanyndaǵy «Belgisiz sarbaz» memorıaldy taqtasy 1975 jyly Jeńistiń 30 jyldyǵy qarsańynda ashylǵan bolatyn. Ol kezde memorıaldy taqtada bar bolǵany 168 azamattyń esimi jazylǵan edi. Ótken bir jyl boıy barlyq aýyl ákimshilikterinen soǵysqa qatysqan, maıdanda habar osharsyz ketken azamattardy jergilikti áskerı komıssarıatpen birlese otyryp túgendendi. Tyńǵylyqty júrgizilgen zertteý, zerdelený jumystarynyń nátıjesinde aýdan boıynsha  6000  azamat soǵys dalasyna attanyp, otan aldyndaǵy paryzyn atqarǵany anyqtalǵan bolatyn. Sóıtip memorıaldy taqta qaıta jańartylyp, urys dalasyna attanǵan azamattardyń esimderi qaıta jazyldy.