OQO-da 50 myń bas shabaq sý qoımasyna jiberildi
ShYMKENT. QazAqparat - OQO-da 50 myń bas shabaq ósirilý úshin sý qoımasyna jiberildi. Bul týraly oblys ákimdiginiń baspasóz qyzmeti habarlady.
Sozaq aýdanyna qarasty «Babata» sý qoımasyna tuqy balyqtarynyń shabaqtary jiberildi. Bul ıgi bastama «2015-2016 jyldarǵa arnalǵan oblysta balyq sharýashylyǵyn damytý» baǵdarlamasy negizinde qolǵa alynǵan.
Sozaq aýdany ákiminiń keńesshisi Berik Áshirbekov, aýdandyq kásipkerlik palatasynyń dırektory Ǵabıt Elbergenuly, aýdandyq kásipkerlik bóliminiń basshysy Almat Altybaı, aýylsharýashylyǵy jáne jer qatynastary bóliminiń basshysy Á.Sahıuly jáne «Kaz.Cold.Fish» JShS dırektory Dinmuhammet Qazaqbaevtar muryndyq bolǵan bul kásipke oblystyq bıýdjetten 400 mln teńge qarasytyrylǵan.
«Bul bastamany 2014 jyly qolǵa alǵan bolatynbyz. Bastapqyda ákimdikpen kelisim shartqa otyrdyq. Odan keıin Taraz qalasyndaǵy balyq sharýashylyǵymen aınalysatyn mamandarmen baılanysyp, ár danasyna 50 teńgeden tólep 100 myń bas tuqy tuqymdas shabaq ákelip jiberdik. Búgin 50 myń bas shabaq jiberip otyrmyz. Ótken jyldary jiberilgen balyqtar aldaǵy kúzde alǵashqy jemisin beredi degen úmittemiz», - deıdi sharýashylyq basshysy D.Qazaqbaev.
Bolashaqta munda balyq ónimderin óńdeıtin arnaıy tseh ashylyp, 15 adamdy jumyspen qamtý jospary bar. Al daıyn ónimder ishki jáne syrtqy naryqqa shyǵarylady dep kútilýde.
