OQO-da 5 jasar búldirshindi ulttyq bıýro qyzmetkeri sýdan qutqardy
ShYMKENT. QazAqparat - Ońtústik Qazaqstan oblysy, Maqtaral aýdanyndaǵy «Dostyq» kanalyna batqan búldirshindi ulttyq bıýro qyzmetkeri qutqaryp qaldy. 5 jasar Eldos abaısyzda kanaldyń shlıýzi tusynda sýǵa túsip ketken, dep habarlaıdy QazAqparat tilshisi jergilikti «Maqtaral» gazetine silteme jasap.
Basylymnyń habarlaýynsha, keleńsiz oqıǵa aǵymdaǵy jyldyń 24-shi naýryzynda 20 shaqty úıden turatyn eldi mekende bolǵan. Eldos ózi sııaqty balalarmen sý jaǵasynda ósip turǵan bir aǵashqa órmelep shyqpaq bolady. Alaıda maıysqaq tal balalardyń salmaǵyn kótere almaı, synyp ketken. Synǵan aǵashpen birge birneshe bala kanalǵa qulap, birnesheýi jaǵalaýǵa qaıta shyǵyp úlgeredi. Al, Eldos ekpindi aǵyspen sýdyń tereńdeý tusynan bir-aq shyǵady. Atalmysh kanaldyń tereńdigi 6 metr, eni 40 metrge jýyqtaıdy.
Eldostyń sýǵa batyp-shyǵyp aǵyp bara jatqanyn kanaldyń arǵy jaǵalaýynda júrgen bir azamat baıqap qalǵan. Ol Sybaılas jemqorlyqqa qarsy is-qımyl Ulttyq bıýrosy OQO boıynsha departamentiniń Maqtaaral aımaǵy aýdanaralyq basqarmasynyń asa mańyzdy ister jónindegi ofıtseri Marat Orazov bolatyn. Qyzmetker búldirshindi aman alyp qalý ońaıǵa soqpaǵanyn aıtady.
«Jalma-jan syrt kıimim men aıaq kıimimdi sheship sýǵa súńgidim. Sý tastaı sýyq. Bala sýǵa qoıylǵan beketterge 5-6 metr jaqyndap qalǵan. Sol bekettiń uıyǵy jutyp ketpeı jatyp qutqaryp qalsam dep barynsha jyldamdatyp júzip jettim ǵoı. Balany kıiminen tartyp kótersem kózi ashyq, beti kógerip ketken, denesi muzdap qatyp qalypty. Ony zorǵa degende jaǵaǵa alyp shyqtym. Búldirshinde qımyl joq, denesi siresip tynys almaı jatyr. Ony aldyma alyp, basyn sýǵa qaratyp, qarysyp, siresip qalǵan jaǵyna suq saýsaǵymdy tyǵyp jaǵyn ashtym da eki ókpesin qysyp edim, baǵanadan beri murnynan aǵyp jatqan las sý aýzynan shyqty. Qaıta-qaıta ókpesinen qysyp, boıyndaǵy sýdan jeńildegen soń bala kózin ashyp, saýsaqtary qımyldaı bastady. Onyń basynan sıpap, qushaqtadym»,- deıdi Marat Rahatuly.
Artynsha búldirshindi jedel járdem qyzmeti alyp ketken. Balanyń densaýlyǵy jaqsaryp, beti beri qaraǵanda ǵana Eldostyń týystary balalaryna ekinshi ret ómir syılaǵan Marat Orazovqa alǵystaryn jaýdyrypty. Syı-sııapat jasamaq ta bolǵan. Alaıda, ulttyq bıýro qyzmetkeri olardyń bergen syılyǵynan bas tartqan.
