OQO-da 45 mektep robototehnıka kabınetimen jabdyqtaldy
ShYMKENT. QazAqparat - Bıyl Shymkentte mektepterdi jóndeý jumystaryna ata-analardan eshqandaı qarjy jınalǵan joq, dep habarlaıdy «QazAqparat» HAA tilshisi.
Shahar basshysy Ǵabıdolla Ábdirahmanovtyń qatysýymen ótken jıynda qalalyq bilim bóliminiń basshysy Janat Tájıeva osylaı dedi.
Janat Tájıevanyń aıtýynsha, bul jumystardy júrgizýge ustazdardyń da qaltalaryna salmaq túspegen, Qalanyń bas muǵalimi 125 mektep pen 88 balabaqshany jóndeýge jergilikti bıýdjetten 141 mln teńge bólingenin jetkizdi. Qazir barlyq bilim mekemeleri jańa oqý jylyna tolyq daıyn. Al,bilim uıalaryn qatty jáne suıyq otynmen qamtamasyz etý úshin qazynadan 221 mln teńge qarjy bólingen. Qazir mamandar jylý júıelerin tekserýden ótkizip jatyr. Jıynda qala basshysy oqýshylardy tasymaldaý jáne órtke qarsy qaýipsizdik sharalary boıynsha daıyndyqty surady.
«Ótken oqý jylynda 11 mekteptiń oqýshylary tasymaldanyp bilim alsa, bıyl 9 bilim mekemesinde balalar tasymaldanyp oqıdy. Ol úshin qaladan 19 avtobýs bólinip otyr», - dedi qalalyq bilim bóliminiń basshysy.
Sonymen qatar bilim berý baǵdarlamasy aıasynda bólingen qarjy esebinen 45 mektep robototehnıka kabınetimen jabdyqtalypty. Taǵy 19 bilim oshaǵynda jańa quraldar ornatýǵa 114 mln teńge qarjy kózdelgen.
