OQO-da 438 aýyl sharýashylyǵy kooperatıvi quryldy
ASTANA. QazAqparat - Ońtústik Qazaqstan oblysynda 50 myń usaq sharýashylyq múshelerinen quralǵan 438 aýyl sharýashylyǵy kooperatıvi quryldy. Bul týraly Ońtústik Qazaqstan oblysynyń ákimi Janseıit Túımebaev ákimdikte ótken májiliste málim etti.
«Elimizdiń Aýyl sharýashylyǵy, Áleýmettik damý mınıstrligi jáne Ońtústik Qazaqstan oblysy ákimdigi arasyndaǵy «Úsh jaqty» ındıkatıvti kórsetkishter jóninde bekitilgen is-sharalar sheńberinde aǵymdaǵy jylǵa taǵy da 75 birlik aýyl sharýashylyǵy kooperatıvterin qurý josparlanyp otyr. Sondaı-aq, bul maqsatqa 6,8 mlrd teńge qarajat bólinip otyr», - dedi Janseıit Qanseıituly.
Óńir basshysynyń aıtýynsha, fermerlerdi nesıelendirý úshin «Nátıjeli jumyspen qamtý jáne jappaı kásipkerlikti damytý» baǵdarlamasynyń 2-shi baǵytymen 3,2 mlrd teńge, «Aýyl sharýashylyǵy qarjylaı qoldaý qory» AQ 1,9 mlrd teńge, «Agrarlyq nesıe korporatsııasy» AQ arqyly 1,3 mlrd teńge bólinetin bolady.
Qazirgi tańda kooperatıvter janyndaǵy 2 sút qabyldaý, 2 mal soıý beketteri 285 mln teńge qarjylandyrylǵan. Odan bólek, 9 mal soıý beketi men 12 sút jınaý beketin qurýǵa 757 mln teńgege qujattar ótkizilip, komıssııa qaraýyna ótkizilgen.
Aıta keteıik, kooperatıvter maqsattaryna sáıkes iri sharýashylyq qurylymdary retinde básekege qabiletti ónim óndirip, qaıta óńdeý kásiporyndaryna shıkizat kózin daıyndaý baǵyttarynda jumys jasaıdy. Bıyl óńirde osy jumystardyń esebinen et jáne sút ónimderderin qaıta óńdeý kásiporyndarynyń ortasha júktelimin 60%-dan 70%-ǵa kóterý belgilengen. Memleket tarapynan kórsetilip jatqan qoldaý sharalaryn paıdalanyp, jeńildetilgen nesıe berý jáne sýbsıdııalaý joldary arqyly 2017 jyly barlyq bekitilgen josparlar jyl aıaǵyna deıin tolyq oryndalady.
Bıylǵy jyldyń 4 aıynda byltyrǵy jylmen salystyrǵanda et óndirý tirileı salmaqta - 4,1 , sút - 1,9 jumyrtqa óndirý 6,9 paıyzǵa kóbeıdi.
Esepti kezeńde múıizdi iri qara boıynsha mal basy ósimi - 5,5 paıyz, qoı men eshki -1,7 paıyz, jylqy - 18,7 túıe - 6,5 qus - 5,9 paıyzǵa artty.
Mal sharýashylyǵyn damytýǵa arnalǵan «Sybaǵa», «Altyn asyq», «Qulan» jáne «Yrys» baǵdarlamalary boıynsha bekitilgen josparǵa sáıkes jumys júrgizilýde.
