OQO-da 43 sý qoımasynyń birqatary lyqa tolyp tur
ShYMKENT. QazAqparat - Ońtústik Qazaqstan oblysynda sý tasqyny boıynsha jaǵdaı qalypty. Soǵan qaramastan kóktemgi tasqynǵa tosqaýyl sharalary qolǵa alynyp otyr.
Óńirdiń Tótenshe jaǵdaılar departamentiniń bastyǵy Nurbolat Derbisov kóktemgi mezgilde bolýy yqtımal tótenshe jaǵdaılardyń aldyn alý boıynsha tıisti jumystar atqarylyp jatqanyn aıtady, dep habarlaıdy QazAqparat HAA tilshisi.
Onyń sózinshe, búgingi tańda oblys kólemindegi 43 sý qoımasynyń birqatary tolýyna baılanysty tranzıttik rejimge kóshirilgen. ıAǵnı, bul degenimiz sý qoımalarynyń nóserlep jaýǵan jaýyn-shashyn men taýdaǵy qardyń erindi sýlaryn qaýipsiz qabyldap ótkizý múmkindigin tómendetken.
Sý tasqynynyń aldyn alý jáne onyń saldaryn joıý úshin bul baǵyttaǵy jumystar bastalyp júıeli júrgizilip jatqanyn jetkizgen Nurbolat Bekbolatuly sý qoımalarda qaýipsiz rejimdi saqtaý barynsha kúsheıtilgenin alǵa tartady. Máselen, Jambyl oblysynda jaýǵan qatty jaýyn-shashyn men taýdaǵy qardyń erýi saldarynan Boraldaı ózeniniń sýy 375 sm-ge kóterilip, Boraldaı eldi mekeniniń tusynda aǵysy sekýndyna 250 tekshe metrdi quraǵan.
«Jergilikti ákimdik pen polıtsııa, órt sóndirý bólimderiniń qyzmetkerleri turǵyndarmen birigip qorǵanys dambalarynyń osal jerlerin kóterip, nyǵaıtyp, táýlik boıy qaýipti jerlerge kezekshilik uıymdastyrý sııaqty atqarylǵan jumystar arqasynda biz úlken tasqyn sýdy ótkizip, Túlkibas aýdanyndaǵy birneshe eldi mekenderdi sý basýdan qorǵadyq»,-dedi N.Derbisov.
Boraldaı ózeniniń tasqyn sýy Arys ózenine qosylyp, sýdyń aǵysy sekýndyna 243 tekshe metr jyldamdyqpen ótken. Saldarynan Ordabasy, Arys, Otyrar aýdandarynda sýdyń deńgeıi kóterilgen. Biraq naqty sharalardy ýaqtyly qolǵa alyp, bógetter jasaýdyń arqasynda sý tasý qaýpi seıilgen. Qazirdiń ózinde oblys aýmaǵyndaǵy ózen arnalarynda qajetti sharalar atqarý, barlyq ózen sýlary men sý qoımalary qatań baqylaýǵa alyp, monıtorıng jasaý jumystary júrgizilýde. Óńirde sý basýy qaýpi bar jerlerde qashyrtqy kanaldar men aryqtardy qoqystardan tazalap, sý ótkizý qabiletin joǵarylatý jáne sý qoımalarynda qaýipsiz rejımdi saqtaý jumystary qolǵa alynyp otyr. Bul rette oblys ákiminiń orynbasary Ulasbek Sádibekov jaýapty mekeme basshylaryna, sondaı-aq aýdan ákimderine kóktemgi sý tasqynyna baılanysty jaǵdaıdy kúnbe-kún baqylap, monıtorıng jasap, barlyq qajetti sharalardy qolǵa alýdy tapsyrǵan bolatyn. Qazir kúngeıde kún edáýir jylynyp, aýa temperatýrasy 20 gradýstan joǵary bolyp tur.
