OQO-da 400-ge jýyq kóshege ataý beriledi
ShYMKENT. QazAqparat - Ońtústik Qazaqstan oblystyq tilderdi damytý, arhıvter men qujattama basqarmasynyń uıymdastyrýymen óńirde «Kóshe ataýlarynyń mańyzdylyǵy» taqyrybynda dóńgelek ústel májilisi ótti. Jıynǵa oblystyq onomastıka komıssııasynyń músheleri men ǵalymdar, aýdandyq, qalalyq mádenıet jáne tilderdi damytý bólimderiniń basshylary men onomastıkaǵa jaýapty mamandar qatysty, dep habarlaıdy QazAqparat HAA tilshisi.
Dóńgelek ústelde Oblystyq tilderdi damytý, arhıvter men qujattama basqarmasynyń basshysy Bastar Esqaraev Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy onomastıka máselesine keńinen toqtaldy.
«Táýelsizdik jyldary syndarly memlekettik saıasattyń arqasynda tól tarıhymyzdy túletý, jurt jadynda umytyla bastaǵan tarıhı ataýlardy qaıta jańǵyrtý qolǵa alyndy. Budan buryn kelisilgendeı, búkil el aýmaǵynda ıdeologııalyq turǵydan eskirgen ataýlar ózgertilýi tıis. Osy oraıda ákimdikter eldi mekenderge, olardyń quramdas bólikterine, obektilerge ataý berý, olardy qaıta ataý kezinde halyq arasynda dáıekti túsindirý jumysyn júrgizýi qajet», - dedi basqarma basshysy.
Búginde oblystyq onomastıka komıssııasynyń kezekti otyrysyna aýdandar men qalalardan túsken 27 usynystyń qujattary resimdelýde. Budan bólek, Shymkent, Túrkistan, Kentaý qalalaryndaǵy 400-ge jýyq kóshege ataý berý boıynsha respýblıkalyq onomastıka komıssııasynyń qaraýyna usynystar daıyndalýda.
Basqosýda jınalǵan mamandar ataýlardyń halyq pikirimen sabaqtastyǵy, kóshe ataýlarynyń mańyzdylyǵy, tarıhı ataýlardy retke keltirý jáne rýhanı jańǵyrý taqyryptarynda óz oılarymen bólisti. Al, jergilikti ákimshilik-aýmaqtyq birlikter jáne olardyń quramdas bólikteriniń ataýlaryna taldaý júrgizilip, ataýy joq nemese ataýy qaıtalanatyn ári ıdeologııalyq turǵydan eskirgen ataýlardy tarıhı jer-sý jáne ulttyq tanymǵa jaqsyn ataýlarmen ózgertý jaıy jan-jaqty sóz boldy.
Aıta keteıik, búginde Ońtústik Qazaqstan oblysyndaǵy 15 aýdan, qalada 185 aýyldyq okrýg, 932 eldi meken jáne 11506 kóshe bar.
