OQO-da 40 adamnyń atynan kredıt alǵan áıel sottaldy
Saryaǵash aýdandyq prokýrorynyń orynbasary Faızýlla Turymovtyń sózinshe, 25 jastaǵy sottalýshy azamattarǵa tez arada qaryz beretin kompanııada operator-esepshi qyzmetin atqarǵan. Ol kompanııaǵa qaryz surap kelgenderdiń ańǵaldyǵyn paıdalanyp, suraǵan aqshalarynyń ústinen artyq aqsha rásimdep otyrypty. Ol qaǵazdarǵa kredıt alǵan adamdar qaramaı qol qoıa salǵan. Sóıtip artyq aqshany bas paıdasyna jaratyp júrgen. Qazirdiń ózinde osyndaı aldanǵan adamdardyń sany 40 adamǵa jetip otyr. Bári de nesıesin tólegenimen, kompanııaǵa taǵy qaryz bolyp qalǵandaryn kesh bilgen.
«Azamattar birinen soń biri aryzdana bastaǵanda tekserý júrgizilip, alaıaq áıeldiń qylmysy áshkere boldy. Qazirdiń ózinde operator-kassır áıeldiń 40 azamatty aldap soǵyp, aqsha alǵany anyqtaldy. Onyń ústinen Qylmystyq kodekstiń 190-baby 2-bóliginiń 3-tarmaǵy «Alaıaqtyq» boıynsha is qozǵalyp, sotqa joldandy. Saryaǵash aýdandyq soty ázirge 8 alaıaqtyq deregi boıynsha úkim shyǵaryp, esepshige bir jylǵa bas bostandyǵyn shekteý jazasy taǵaıyndaldy»,- deıdi Faızýlla Turymov.
Prokýratýranyń málimetinshe, qazirgi tańda sottalýshynyń ústinen taǵy 32 alaıaqtyq deregi boıynsha qylmystyq is qozǵalyp, tergeý amaldary júrgizilýde. Esepshiniń kinási dáleldense onyń jazasy aýyrlaı túsýi múmkin. Sotqa deıin tergeý jumystary jalǵasýda.