OQO-da 4 aýdan men 1 qala sel qaýpi bar aımaqta ornalasqan
ShYMKENT. QazAqparat - Ońtústik Qazaqstan oblysynda Tótenshe jaǵdaılar departamentiniń bastyǵy Nurbolat Derbisov pen onyń orynbasary óńirdegi selden qaýipti ýchaskelerine áýeden sholý zertteý jumystaryn júrgizdi, dep habarlaıdy QazAqparat tilshisi.
Sala mamandarynyń sózinshe, qazirgi tańda oblystyń sel basý qaýpi bar aýmaǵynda 4 aýdan jáne 1 qala ornalasqan. Sondaı-aq, Aqsý, Badam, Saıram sý, Baldyberek, Ógem, Jabaǵyly sý ózenderiniń alaby da selden qaýipti dep sanalady. Bul máseleni oblys ákimi Janseıit Túımebaev tikeleı baqylaýǵa alǵan.
Aıta ketetin jaǵdaı, ótken jyly qaýipti ýchaskelerdi anyqtaý men tabıǵı jáne tehnogendik sıpattaǵy tótenshe jaǵdaılardy aldyn alý maqsatynda oblystyq bıýdjetten qarjy qaralǵan bolatyn. Osy jumystardyń arqasynda jedel túrde sharalar qabyldaý úshin 11 ret áýeden sholý júrgizildi. Bul jumystar bıyl da jalǵasyn tapty. Departament basshylary oblys aýmaǵynda qaýipti kezeń mamyr aıynyń sońynda bastaý alatyndyǵyn eskerip, Tólebı, Túlkibas aýdandaryndaǵy Qarjantaý jáne Maıdantal taýly jotalarynyń qar qoryn sholyp shyqty. Taýdan bastaý alatyn sý, sel qaýipti basseıindik ózenderdiń jaǵdaıymen tanysty. Zertteý barysynda jalpy taýly aımaqtaryndaǵy 42 muzdyq kólderden sel qaýpi anyqtalǵan joq.
Óńirdiń tótenshe jaǵdaılar qyzmeti sondaı-aq, jergilikti atqarýshy organdarymen tyǵyz baılanysta jumys atqaryp otyr. Selmen baılanysty bolýy múmkin tótenshe jaǵdaılardy aldyn alý úshin qaýipti ýchaskelerde 102 eskertý taqtaıshalaryn ornatty. Al, «Qazseldenqorǵaý» Ońtústik Qazaqstan aımaqtyq tehnıkalyq-paıdalaný basqarmasynyń mamandary oblys aýmaǵynda 69 sel qaýpi bar ýchaskelerdi anyqtap, ony tómendetý maqsatynda kúndelikti gıdrometeorologııalyq jaǵdaıǵa monıtorıng jasaýda. Sonymen birge oblys aýmaǵynda sel aǵyny jaǵdaıyn baqylaýǵa alý úshin oblystyń ózen boılaryndaǵy qaýipti ýchaskelerinde 165 ret zertteý jumystary júrgizildi. Jurtshylyqty qulaqtandyryp, sel tasqyny týyndaý kezeńinde olardyń is-qımyldaryn qalyptastyrý úshin úgit-nasıhat júmystary da qolǵa alynyp otyr. Aýyldyq okrýgter ákimderine, uıymdardyń, oqý oryndarynyń basshylaryna, jeke turǵyn úılerdiń ıelerine, sel tasqyny áser etetin aımaqta ornalasqan sharýashylyq nysandar men mekemelerge habarlamalyq nusqaýlyqtar, jadnamalar taratylýda.
