OQO-da 37 jastaǵy turǵyn qyrym qandy bezgegin juqtyrdy
ShYMKENT. QazAqparat - Ońtústik Qazaqstan oblysynda kún jylynǵaly beri myńnan asa adamdy kene shaǵyp, bir adam qyrym qandy bezgegin juqtyryp aldy. Bul týraly óńirdiń tutynýshylar quqyǵyn qorǵaý departamentiniń mamandary málimdedi, dep habarlaıdy QazAqparat HAA tilshisi.
Departamenttiń bólim basshysy Talǵat Arymbaevtyń sózinshe, búgingi tańda kene shaqqan turǵyndardyń sany 1119 qurap otyr, al qyrym qandy bezgegin juqtyrý jaǵdaıy Maqtaral aýdanynda tirkeldi.
«37 jastaǵy turǵynnyń aıtýynsha, ol 7 mamyr kúni qoı qyryqqan. Sol kezde aıaǵyn kene shaǵyp alypty. Artynan ystyǵy kóterilip, mazasyzdanǵan. Dárigerge qaralyp, bezgekti juqtyrǵany anyqtaldy. Búginde naýqastyń jaǵdaıy qalypty. Maqtaral aýdanyndaǵy ortalyq aýrýhanasynda em qabyldap jatyr»,-deıdi bólim basshysy.
Sondaı-aq qazirgi tańda oblys kóleminde kenege qarsy dárileý jumystary júrgizilýde eken. Sala mamandarymen 13 myńǵa tarta kene jınap, zerttepti. Olardyń aıtýynsha, kóktemgi aýa raıynyń salqyn bolýynan jándikter mýtatsııalanyp, olardyń túri 30-ǵa jetken. Basym kópshiligi zııandy ekeni anyqtalǵan.
«Ótken jylmen salystyrǵanda bıyl kenelerdiń belsendigi keshteý bastaldy. Jándik shaqqandardyń sany da shamaly tómendegen. Munyń bári bıylǵy jylǵy aýa raıynyń jańbyrly bolýynan dep otyrmyz. Degenmen, bizdi keneniń túri kóbeıip bara jatqany alańdatady. Sondyqtan monıtorıng júrgizip jatyrmyz»,-dedi Talǵat Arymbaev.
Epıdemıologtar turǵyndarǵa taýǵa shyqqanda uzyn jeńdi kıim men shalbar kıip júrý qajettigin eskertedi.
«Kúndelikti denesin tekserip qoıý da artyqtyq etpeıdi»,-deıdi olar.
