OQO-da 360 oryndyq jańa balabaqsha ashyldy
ShYMKENT. QazAqparat - Ońtústik Qazaqstan oblysy Arys qalasynda memlekettik-jekemenshik áriptestik aıasynda 360 oryndyq balabaqsha paıdalanýǵa berildi. Jańadan ashylǵan «Lıder» balabaqshasynda búginde 55 adam jumyspen qamtylǵan, dep habarlaıdy QazAqparat tilshisi.
Zamanaýı úlgide salynǵan ǵımaratqa 380 mln teńgedeı qarjy jumsalǵan. Bóbekjaı zamanaýı qural-jabdyqtarmen qamtylǵan. Jas órenderdiń tárbıe alýyna jáne olardyń boıyna bilimniń alǵashqy negizin qalaýǵa qajetti jaǵdaıdyń barlyǵy jasalyp otyr. Balabaqsha ishindegi oıyn alańyna da erekshe kóńil bólingen. Óıtkeni, mekemeniń basty baǵyty búldirshinderge tek tárbıe berip qana qoımaı, olardyń sportpen aınalysýyna da basa nazar aýdarylǵan.
Arys qalasyna jasaǵan jumys sapary barysynda oblys ákimi Janseıit Túımebaev mektepke deıingi bilim beretin mekemeniń ashylý saltanatyna qatysyp, búldirshinderge baldyrǵan velosıpedin syıǵa tarty. Budan bólek, aımaq basshysy Arys qalasyndaǵy memlekettik-jekemenshik seriktestik aıasynda qurylysy júrip jatqan balabaqshamen de tanysty. 100 orynǵa shaqtalǵan balabaqshanyń quny 80 mln. teńgeni quraıdy. Zamanaýı úlgide salynyp jatqan nysan 2018 jyly paıdalanýǵa beriledi dep kútilýde.
Aıta keteıik, toǵyz joldyń torabynda ornalasqan Arys qalasynda búginde 49 mektepke deıingi uıym bar. Onda 4207-de bala tárbıelenýde, ıaǵnı balabaqshamen qamtylý kórsetkishi 85,9 paıyzdy qurap otyr. Sonyń ishinde memlekettik-jekemenshik áriptestik aıasynda 27 jekemenshik balabaqsha, 10 memlekettik, 12 mektep janynan ashylǵan balabaqsha jumys istep keledi.
