OQO-da 33 modýldi sút qabyldaý beketi iske qosyldy
ShYMKENT. QazAqparat - Ońtústik Qazaqstan oblysynda aýyl sharýashylyǵy kooperatıvterin qurý jumysy qarqyndy túrde júrgizilýde. Osy maqsatta oblys ákimi Janseıit Túımebaevtyń tapsyrmasymen jyl basynan beri aýyl sharýashylyǵyn memlekettik qoldaý sharalary men kooperatıvterdiń artyqshylyqtary týraly oblystyń barlyq aýdan-qalalarynda mamandandyrylǵan kóshpeli semınar-keńester uıymdastyrylyp keledi, dep habarlaıdy QazAqparat HAA tilshisi.
Dál osyndaı kezekti semınar búgin Shymkent qalasynda ótti. Bul jolǵy shara óńirdegi sút klasterin damytýǵa arnalyp otyr. Jıynǵa oblystyń barlyq aýdandarynan aýyl sharýashylyǵy basqarmasynyń mamandary, qarjy uıymdarynyń ókilderi, sharýalar men kooperatıv músheleri qatysty. Sharanyń maqsaty - aýyl sharýashylyǵy kooperatıvterin qurýdaǵy máseleler men kedergilerdi anyqtap, sharýalarǵa ákimdik tarapynan barynsha qoldaý kórsetý boldy.
Semınarda sóz alǵan oblys ákimi Janseıit Túımebaev kooperatıv tóraǵalaryna 10 modýldi sút qabyldaý beketiniń kilitterin saltanatty túrde tabys etti. 
Aıta keteıik, quny 5 mln teńge turatyn sút beketteriniń 50 paıyzy memleket tarapynan sýbsıdııalanǵan. Sý jańa beketter sút saqtaýǵa arnalǵan tanker, arnaıy zerthana, tońazytqyshtarmen jabdyqtalǵan. Bul óz kezeginde sharýalardyń tabasyn eselep qana qoımaı, óńirdegi sút óndirisin órkendetýge sep bolmaq.
«Jyl basynda qolǵa alynǵan mamandandyrylǵan kóshpeli semınarlar búginde óz nátıjesin berip otyr. Túsindirý, úgit-nasıhat jumystarynyń arqasynda óńirde 55 myńnan astam usaq sharýa qojalyqtary biriktirilgen kooperatıvter sany 596 - ǵa jetti. Osy kórsetkishke oraı oblysymyz respýblıkada kósh bastap otyrǵanyn aıta ketken jón», - dedi Janseıit Túımebaev.
Semınar barysynda oblysta sút óndirisin damytý jaıy talqylanyp, sharaýlar osy salaǵa baǵyttalǵan memlekettik qoldaýlar men jeńildikter jaıly paıdaly aqparttar aldy. Sharýalar tarapanynan qoıylǵan saýaldarǵa qarjy uıymdarynyń ókilderi men sala mamandary tıisti jaýaptaryn berip, aqyl-keńesterimen bólisti. 
Sondaı-aq óńirde memlekettik qoldaý kólemi jyldan-jylǵa ulǵaıyp keledi. Máselen, bıyl aýyl sharýashylyǵy salasyn nesıelendirýge respýblıka boıynsha 27 mlrd teńge bólinse, sonyń 3,2 mlrd teńgesi Ońtústik Qazaqstan oblysyna baǵyttalyp otyr.
Budan bólek, «Nátıjeli jumyspen qamtý» baǵdarlamasy jáne «QazAgro» AQ OQO enshiles mekemeleri arqyly sharýalar men kooperatıv múshelerine túrli baǵdarlamalar boıynsha jyldyq 6 paıyzben nesıeler berilýde. Búgingi kúni músheler sany 20-dan joǵary kooperatıvterde 33 sút qabyldaý beketteri jumys istep tur. Qazirgi tańda sút qabyldaý beketterine aýyl sharýashylyǵy arqyly 439 mln teńge ınvestıtsııalyq sýbsıdııa berilgen. Onyń ishinde 18 sút qabyldaý beketine 50,8 mln tenge sýbsıdııa tólenip otyr.
