OQO-da 300-den asa janarmaı beketteri jabylýdyń aldynda tur
ShYMKENT. QazAqparat - Ońtústik Qazaqstan oblysynda 300-den asa janarmaı beketi jabylýdyń az-aq aldynda tur. Bul týraly óńirdegi janar-jaǵarmaı qaýymdastyǵynyń tóraǵasy Qaıypbek Qambarov málimdedi. Onyń sózinshe qazir oblystaǵy shaǵyn jáne orta bıznes ókilderi kóptegen qıyndyqtardy bastan ótkerýde, dep habarlaıdy QazAqparat HAA tilshisi.
Qaýymdastyq tóraǵasy búginde Shymkenttegi munaı óńdeý zaýytynan tikeleı janarmaı alý qıyndap, beket qojaıyndary shyǵynǵa batyp otyrǵanyn aıtady. Esesine 15 qor jınaýshy alpaýyt kompanııalarǵa tıesili deldaldar benzındi arzan baǵamen alyp, qymbat baǵamen satýda eken. Beket qojaıyndary zaýyttyń ózinen alýǵa tyrysqanymen ondaǵylar «bosatylatyn benzın kólemi jetkiliksiz, barlyǵyna birdeı tarata almaımyz» degen jaýap alǵanyn aıtady. Al, máseleni aıtyp bılik basyndaǵylarǵa, Energetıka mınstrligi men «Nur Otan» partııasyna hatpen shyǵyp, kómek suraǵanymyzben nátıje shyqpady dep qynjylady. Jaǵdaı osylaı kete berse óńirdegi 300-den asa beket jumysyn toqtatyp, 3 myńǵa tarta adam jumyssyz qalýy múmkin. Sebebi, qazirgi deldaldardan alyp otyrǵan baǵa ketken shyǵyndy da aqtamaı otyr. 
«Mysalǵa AI-92 satylymda orta eseppen 138-142 teńgeniń aralyǵynda bolatyn bolsa, qor ustaýshy kompanııalar 136 teńgeden satyp jatyr. Arada 2-3 teńge ǵana túsetin. Osy 2-3 teńgege bizdiń kásipkerler alyp jatyr. Biraq damý máselesi joq, jabylý máselesi tur. Jaǵdaı óte qıyn»,- deıdi OQO janar-jaǵar maı qaýymdastyǵynyń tóraǵasy Qaıypbek Qambarov. 
Eske salaıyq, buǵan deıin óńirde zaýyttan bosatylatyn jana-jaǵarmaıdy jergilikti bılikten quralǵan arnaıy komıssııa bólip, barlyq 14 aýdandaǵy barlyq operatorlarǵa jetýin qamtamasyz etip kelgen edi. Alaıda bul júıege birqatar ózgerister engizilip, zaýyttan janarmaı alý múmkindigine tek qor jınaýshy kompanııalarǵa qarasty 150-deı beket qana ıe bolyp otyr eken.
