OQO-da 3 myńǵa jýyq boryshker elden shyǵa almaıdy
ShYMKENT. QazAqparat - Ońtústik Qazaqstan oblysynda memlekettik sot oryndaýshylarynyń sany 30 paıyzǵa qysqartylyp, jeke sot oryndaýshylar sany 196 jetken. Bul týraly búgin aımaqtyq kommýnıkatsııalar qyzmetinde oblystyq Ádilet departamentiniń basshysy E.Daýylbaev málimdedi, dep habarlaıdy «QazAqparat» HAA tilshisi.
Byltyr jeke sot oryndaýshylar tarapynan alımentterdi óndirýge qatysty aýqymdy jumystar atqarylǵan. Óńirde alımentterdi óndirý boıynsha eki mamandandyrylǵan jáne qosymsha jeke sot oryndaýshylar keńsesi ashylǵan. Jumyspen qamtý jáne áleýmettik baǵdarlamalar basqarmasymen birlese jazalǵan memorandým aıasynda 47 boryshker jumysqa ornalastyryldy. Alıment tóleýden bas tartqany úshin boryshkerlerdiń qylmystyq jaýapkershilikteri qaralǵan. 2 919 boryshkerdiń elden shyǵý múmkindigi ýaqtyly toqtatylǵan.
«Qoldanystaǵy zańnamalardyń normalaryn buzǵany úshin 7 notarıýstyń lıtsenzııasy toqtatylyp, 40 notarıýs tártiptik jaýapkershilikke tartylǵan. Zańǵa qarama qaıshy áreketter jasaǵan 2 notarıýs pen 2 advokat lıtsenzııalarynan aıyrylǵan», - dedi E.Daýylbaev.
Departament basshysy budan bólek, QR «Ákimshilik quqyq buzýshylyqtar týraly» Kodeksiniń 457 baby 1 tarmaǵyna sáıkes, normatıvtik quqyqtyq aktilerdi memlekettik tirkeýge ýaqytyly usynbaǵany úshin Maqtaral, Ordabasy, Otyrar aýdandaryndaǵy 4 laýazymdy tulǵaǵa qatysty ákimshilik ister qozǵalyp, aıyppuldar salynǵanyn atap ótti.
Sondaı-aq óńirlik Ádilet departamenti qyzmetkerleri tarapynan zańsyz aınalymnan 3,5 mln teńgeniń 484 dana kontrafaktilik ónimderi alynǵan. «Hermes International S.C.A», «Aplle Ins», «Brown-Forman Finland, Ltd», «HELIX», «Rahat Shymkent» jáne basqa da taýar tańbalarynyń ıelenýshilerdiń quqyqtary qorǵalǵan.
Aınur Aqbaeva
