OQO-da 3 mln-shy turǵynǵa páter beriledi - Janseıit Túımebaev
ShYMKENT. QazAqparat - Ońtústik Qazaqstan oblysynda 3 mln-shy turǵyn dúnıege kelse, páter beriledi. Bul týraly aımaq basshysy Janseıit Túımebaev kezekti eseptik jıynda málimdedi, dep habarlaıdy QazAqparat tilshisi.
Aıta keteıik, eseptik jıynda Gúljan Jolbarys esimdi kópbalaly ana ákimge oblysta 3 mln-shy náreste týylsa, qandaı syı-syıapat jasaıtynyn suraǵan bolatyn. Jıynda sonymen qatar Qazyǵurt aýdanyndaǵy eskirgen mektepterdiń máselesi men Saryaǵash aýdanyndaǵy kanaldardy tazartý máseleleri de kóterildi. Halyq aldynda esep bergen Janseıit Qanseıituly sondaı-aq óńirdegi 9 aýdanda pedagogtarǵa arnalǵan 20 kópqabatty qyzmettik úı salynatynyn atap ótti.
Ondaǵy pəterler aýyl mektepterine jiberiletin muǵalimderge beriledi. Oblys ákimi baqsha ónimderin shetelge eksporttaýdan úlken paıda taýyp jatqan aýdandardyń qatarynda Maqtaral, Shardara aýdandary kósh bastaıtynyn aıta kele, jalpy óńirdiń ál-aýqatyn kóterýdiń birden bir joly - aýyl sharýashylyǵyn damytý ekenin eske saldy. Agrarly aımaqtyń agroónerkásip salasynda atqarylǵan jumystaryna toqtalǵan ákim memlekettik qoldaýdyń arqasynda 522 mlrd. teńgeniń ónimi óndirilip, 2 paıyzǵa artqanyn jáne bul kórsetkish boıynsha oblys respýblıkadaǵy úlesi boıynsha 2-shi orynǵa kóterilgenin aıtty.
Sonymen qatar Maqtaral, Saryaǵash, Shardara aýdandarynyń elektr qýaty tapshylyǵyn boldyrmaý jáne aımaqty jetkilikti elektr qýatymen qamtamasyz etý úshin «Qyzylásker» qosalqy stansasynyń salynatyn sóz etti.
«Jahandyq jańartylǵan energııa kózderin qoldanýdy ınvestorlar arqyly júzege asyrý bizdiń basty baǵyttarymyzdyń biri. Osyǵan baılanysty, Tólebı aýdanynda qýaty 2,5 MVt «Keńes» shaǵyn sý elektr stantsııasynyń qurylysy bastalady. Saryaǵash aýdanynda jalpy qýaty 5 MVt bolatyn eki shaǵyn sý elektr stantsııasy, sonymen birge «Jylǵa» aýylynda qýaty 20 MVt kún elektr stantsııasynyń qurylysy bastalady. Bul elektr stantsııasy kúnnen óndirilgen elektr energııasyn temirjol kóligi salasynda paıdalanatyn álemdegi eń alǵashqy joba bolady. Budan bólek, Jetisaı qalasy mańynda kún elektr stantsııasy qurylysyn júrgizý josparda tur. Jobaǵa 10,7 ga jer bólingen, qýaty 4,8 MVt. Sonymen qatar, Báıdibek aýdanynda qýaty 40 MVt jáne Otyrar aýdanynda jalpy qýaty 135 MVt kún elektr stantsııalary boı kóteredi», - dedi J.Túımebaev.
Óndiristi damytýǵa qolaıly jaǵdaı jasap, oblys turǵyndaryn qajetti ınfraqurylymmen qamtý basty baǵyttaǵy jumystardyń biri ekenin aıtqan óńir basshysy elektrmen qamtý salasy boıynsha 13 nysannyń qurylysy júrgiziletinin atap ótti. Nátıjesinde oblystaǵy 686 eldi meken turǵyndary sapaly elektr qýatyn tutynatyn bolady.
Sonymen birge ákim taza aýyz sýmen qamtamasyz etý salasynda 39 joba iske asyrylyp, sý qubyry múldem joq 13 eldi mekenge jańa aýyz sý qubyrlary salynyp, qamtylǵan eldi mekender sany 636-ǵa jetetinin aıtty.
Esepti jıynda málim bolǵanyndaı oblysta tabıǵı gazben qamtamasyz etý salasynda 67 nysannyń qurylysy júrgizilip, 42 eldi mekenge, ıaǵnı, 60,3 myń turǵynǵa tabıǵı gaz jetkiziletin bolady. Bul oblystaǵy jalpy 386 aýyldy, nemese turǵyndardyń 46,2 paıyzyn qamtamasyz etý degen sóz.
