OQO-da 276 myń gektar alqap shegirtkege qarsy dárilenedi

Sebebi, osy aýmaqta jyl saıyn úıirli shegirtke tektes zııankester shyǵady. Sala mamandary endi  163,5 myń gektar  jerdi agregattarmen, 40 paıyzdan astamy avıatsııamen, 1 paıyzǵa jýyq alqap aspaly búrikkishtermen óńdelmek, dep habarlaıdy QazAqparat HAA tilshisi.

 Oblys ákimi  Janseıit Túımebaevtyń tóraǵalyǵymen ótken jıynda Ońtústik Qazaqstan oblystyq aýmaqtyq ınspektsııa basshysy Núrken Badyraqov hımııalyq kúres sharalary  byltyrǵydan eki ese artyǵymen atqarylatynyn málimdedi. Onyń sózinshe  marokko shegirtkesine qarsy sharalar  257,58 myń gektarda, al azııalyq shegirtkege qarsy  12,4 myń gektarda júrgizilmek. Sondaı-aq, ıtalııalyq prýs shegirtkesine qarsy  5,92 myń gektar jerge hımııalyq dári sebiledi.

«Óńdeletin alqaptyń 140,35 myń gektary  Saryaǵash aýdanyna tıesili bolsa, 56,3 myń gektary  Arys qalasynyń jerleri.  27,2 myń gektar  Shardaraǵa, 20 myń gektar  Ordabasy aýdanyna,  8  myń gektary Báıdibek aýdanyndaǵy alqaptar.  Oblystyq aýmaqtyq ınspektsııa tarapynan óńdeý jumystaryn sapaly júrgizilýin baqylaýǵa, uıymdastyrý jumystaryn júrgizýge aýdandar boıynsha 42 ınspektor jáne 18 avtokólik bólinedi» , - deıdi Ońtústik Qazaqstan oblystyq aýmaqtyq ınspektsııa basshysy Núrken Badyraqov.

Aıta keteıik,  257,58 myń gektar  alqapta hımııalyq óńdeý jumystaryn júrgizý úshin 1574,7 myń gektar  alqapta anyqtaý-zertteý jumystary júrgizý josparlanypty. Oǵan «Respýblıkalyq fıtosanıtarlyq dıagnostıka jáne boljamdaý ádistemelik ortalyǵy» memlekettik mekemesiniń oblystyq fılıaly tarapynan shtat boıynsha 58 adam bólinip otyr. Buǵan qosymsha 3 aıǵa ýaqytsha jumysqa tartý arqyly 33 adam jumyldyrylyp,  barlyǵy 91 adam anyqtaý-zertteý jumystaryn júrgizedi. Anyqtaý-zertteý jumystaryn sapaly júrgizý úshin aýdandyq, qalalyq jumyspen qamtý ortalyqtarynan qosymsha 287 anyqtaýshy  bólinetin bolady. Marokko shegirtkesine qarsy hımııalyq óńdeý jumystaryna 71 dana jer ústi agregaty, 5 dana AN-2 ushaǵy qaralyp otyr.

Óz kezeginde aımaq basshysy  úıirli shegirtkege qarsy kúres sharalaryn joǵary deńgeıde uıymdastyryp, zertteý-anyqtaý sharalaryn tyńǵylyqty ári sapaly júrgizýdi eskertti.

«Úıirli shegirtkege jáne ózge de zııankesterge qarsy hımııalyq kúres sharalaryna  asa jaýapkershilikpen qaraý kerek. Óńdeý jumystaryna qajetti tehnıkalardy der kezinde bólý men qajetti mamandardy bólýdi aýdan jáne  qala basshylaryna tapsyramyn» , - dedi Janseıit Qanseıituly.