OQO-da 226 kópqabatty turǵyn úıdiń qurylysy júrip jatyr
ShYMKENT. QazAqparat - Ońtústik Qazaqstan oblysynda bıylǵy jyly 196 ınvestıtsııalyq jobanyń qurylysy júrgizilip jatyr. Salynyp jatqan nysandardyń 123-in osy jyldyń sońyna deıin paıdalanýǵa berý josparlansa, 73-i keler jylǵa ótedi. Bul týraly oblystyq qurylys basqarmasynyń basshysy Salyhan Polatov málim etti, dep habarlaıdy QazAqparat HAA tilshisi.
Jańadan boı kótergen nysandardyń búgingi kúnge 7-eýi paıdalanýǵa berilgen. Atap aıtar bolsaq, olar: Saryaǵash aýdanynda 4 qabatty turǵyn úı, Otyrarda ınjenerlik-kommýnıkatsııalyq júıeler men Túrkistan qalasyndaǵy aýysymyna 100 adam qabyldaıtyn Shornaq aýyldyq emhanasy, Maqtaral, Ordabasy, Otyrar aýdandarynda 50 adam qabyldaıtyn 3 dárigerlik ambýlatorııa men Shymkent qalasyndaǵy qoqys qaldyqtaryn rekýltıvatsııalaý nysandary bolyp tabylady.
«Bıylǵy jyldyń qańtar-naýryz aılarynda oblys aýmaǵynda qurylys jumystary kóleminiń ındıkatory 24,3 mlrd. teńgeni qurap, ótken jyldyń osy merzimimen salystyrǵanda 109,3%-ǵa oryndaldy. «Nurly jer» turǵyn úı qurylysy baǵdarlamasy aıasynda bıyl oblysymyzda 550,6 myń sharshy metr turǵyn úıdi paıdalaný úshin tapsyrý mindettelgen. Barlyq qarjylandyrý kózderi arqyly osy jyly 700 myń sharshy metr bolatyn 226 turǵyn úıdiń qurylysy júrgizilip jatsa, 117 kópqabatty turǵyn úıdiń qurylysyn aıaqtap paıdalanýǵa berý kózdelýde»,-dedi Salyhan Polatov.
Basqarma basshysy sonymen qatar osy jyldyń qańtar-naýryz aılarynda oblys aýmaǵynda baǵdarlamanyń barlyq baǵyttary boıynsha 1758 páter ıaǵnı, 206,2 myń sharshy metr turǵyn úı tapsyrylyp, ótken jyldyń osy merzimimen salystyrǵanda 100,1% oryndalǵanyn atap ótti.
