OQO-da 172 myńnan astam azamat jer kezeginde tur
Bas josparǵa sáıkes, turǵyn úı qurylysyna arnalǵan ýchaskelermen qamtamasyz etý úshin 21 700 gektar jer qarastyrylǵan. Bul týraly oblystyq Jer qatynastary basqarmasynyń basshysy Sozaqbaı Ábdiqulov málimdedi, dep habarlaıdy QazAqparat HAA tilshisi.
Búginde oblys aýmaǵynda 11 mln. 728 myń gektar jer bar bolsa, onyń 441 myń gektary kezinde ustaǵannyń qolynda, tistegenniń aýzynda ketken. Endi jergilikti atqarýshy organdar jer berýde zań aıasynda jumys atqaratyndaryn aıtýda.
«505 myń gektar jer osy 5 jyldyń kóleminde qosylady degen joba jasap otyrmyz. Ótken jyly moratorııdiń jarııalanýyna baılanysty aýylsharýashylyq jerler konkýrsqa shyǵarylyp, sharýalarǵa berilgen joq. Soǵan baılanysty qazir kóptegen sharýalarymyz ótinish jasap otyr. Bıylǵy jyly 106 myń gektar jerdi konkýrspen sharýalarǵa berý boıynsha aýdan, qalalarmen joba jasalynýda», - dedi oblystyq Jer qatynastary basqarmasynyń basshysy Sozaqbaı Ábdiqulov.
Basqarma basshysynyń sózinshe, qazir osy jaıylymdyq jerlerdi túgendeý jumystary júrip jatyr. Sodan soń, tapsyrmaǵa sáıkes shalǵaı aımaqtardan jaıylymdyq jer bólip berý kózdelýde. Al, aýylsharýashylyq maqsattaǵy jerlerlerdiń kópshiligi ıgerýsiz jatyr. Nátıjesinde 2500 jer paıdalanýshyǵa zańǵa sáıkes shara qoldanyldy. Sala mamandary osyndaı 55 myń gektar jerdi arnaıy jer qoryna qaıtaryp alypty.
Sozaqbaı Ábdiqulovtyń aıtýynsha óńirde aýylsharýashylyq maqsattaǵy jerlerdiń basym bóligi erozııaǵa ushyraǵan. Topyraqtyń qunarlyǵyn saqtaý úshin agrotehnıkalyq sharalar júrgizilý ústinde. Ol úshin elektrondy topyraq kartasy ázirlenýde. Oǵan egistik alqaptaryndaǵy topyraq qunarlyǵynyń deńgeıi, erozııaǵa ushyraǵan jerlerdiń kólemi jáne erozııa túrleri týraly qajetti málimetter engiziledi. Sol arqyly jerdiń azýyn toqtatý jáne topyraqtyń qunarlyǵyn saqtaý maqsatynda tıisti agrotehnıkalyq sharalardy júrgizý usynylady.
«Qazirgi tańda, aýyl sharýashylyǵy jerleriniń elektrondyq bazasyn daıyndaý jumystary Túrkistan, Kentaý qalalary men Túlkibas, Otyrar aýdandarynda atqarylyp, Túlkibasta tolyqtaı aıaqtaldy. Odan bólek, osy jyly mundaı jumystar Báıdibek aýdany men Arys qalasyndaǵy aýylsharýashylyq maqsattaǵy jerlerde bastalady dep kútilýde. Jalpy, oblystaǵy barlyq aýdan, qalalarda osyndaı kartalardy ázirleý jumystaryn 2020 jylǵa deıin aıaqtaımyz degen jospar bar», - dedi S.Ábdiqulov.
