OQO-da 170 myńǵa jýyq kópbalaly ana bar
ASTANA. QazAqparat - Búgin Ońtústik Qazaqstanda «8 naýryz - halyqaralyq áıelder kúni» merekesine arnalǵan «Ana-Nur-Kóktem» atty saltanatty jıyn ótti, dep habarlaıdy oblys ákiminiń baspasóz qyzmeti.
Oblys ardagerleri men zııaly qaýym ókilderi, oblystyq assambleıa ókilderi, oblys ákiminiń janyndaǵy áıelder isteri jáne otbasylyq - demografııalyq saıasat jónindegi komıssııa músheleri, oblystyń aýdan, qalalarynan túrli salada qyzmet etetin qyz-kelinshekter syndy jalpy sany 200-ge jýyq názik jandy azamattar qatysqan beıresmı otyrysty óńir basshysy Janseıit Túımebaev ashyp berip, arý analardy kóktemniń keremet meıramymen quttyqtady.
«Bizdiń qazirgi qoǵamymyzda áıel tek otbasynyń bereke-birligin oılaıtyn tulǵa ǵana emes, ol memlekettik jáne saıası máselelerge belsene aralasatyn qoǵam múshesi. Sondyqtan elimizde áıel adamnyń áleýmettik qorǵalýyna, olardyń ómir súrý deńgeıin arttyrýǵa aıryqsha mańyz beriledi. Ata-babalarymyz ejelden qyzdaryn qurmettegen. Kelinderi men jarlaryn syılaǵan. «Jumaq ananyń tabanynyń astynda», «Qyz ósse - eldiń kórki» dep joǵary baǵalaǵan». Qymbatty hanymdar! Sizderdiń attaryńyzǵa aıtylatyn alǵystar men jyly sózder eshýaqytta tolastamasyn. Kóktemniń shýaqty kúnderindeı árdaıym kórikti bolyp júre berińizder», - dedi J.Qanseıituly.
Munan soń, aımaq basshysy úıdiń de, túzdiń jumysyn qatar alyp, qoǵamda aıryqsha belsendiligimen kózge túsip júrgen 32 áıeldi marapattap, onyń úsheýine «Oblysqa sińirgen eńbegi úshin» belgisin berse, 12-ne oblysy ákiminiń gramotasyn, taǵy 12-ne oblys ákiminiń alǵys hatyn tabystady. Al 5 anany «Altyn alqa» tósbelgisimen marapattady. Sondaı-aq, búgingi sharaǵa kelgen barlyq áıelderge ákimniń shaǵyn syıy berildi.
Sonymen birge, merekelik otyrysta oblystyq máslıhattyń hatshysy Q.Balabıev pen oblystyq Janar-jaǵarmaı qaýymdastyǵynyń tóraǵasy Q.Qambarov quttyqtaý sóz sóılep, shara sońy tek názik jandylarǵa arnalǵan óleń, bımen jalǵasty.
Merekelik kezdesýde názik jandylarǵa jasalǵan tosyn syıdyń biri oblystyq basqarma basshylarynyń syıy edi. Basqarma jetekshileri, jıynda, sahnaǵa shyǵyp, áıelderdiń qurmetine hormen án aıtyp berdi.
Aıta ketý kerek, búginde oblysta 1 mln 440 myń áıel azamattary ómir súrse, olardyń 267-i ǵylym doktory, 1 458-i ǵylym kandıdaty, 214-i professor, 604-i dotsent.
Al 2 676 názik jandy memlekettik qyzmetker bolyp tabylady. Áıel azamattar oblystaǵy memlekettik qyzmetshilerdiń 30,7 paıyzyn, bilim salasyndaǵy pedagogtardyń 76,8 paıyzyn, densaýlyq saqtaý salasyndaǵy qyzmetkerlerdiń 86 paıyzyn qurap otyr.
Oblysymyzda ómirge urpaq ákelip, olardy tárbıelep ósirýde úlgi-ónege bolyp júrgen «altyn qursaqty» analar jetkilikti. Respýblıkadaǵy árbir besinshi bala Ońtústik Qazaqstan oblysynda dúnıege keletini barshaǵa málim.
Búginde óńirimizde 169 330 kóp balaly analar esepte turady. Olardyń 6 157-i «Batyr analar», 25426-y «Altyn alqa», 34 756-y «Kúmis alqa» ıegeri. Al, 8 791 ana І-shi jáne ІІ-shi dárejeli «Ana Dańqy» ordenimen marapattalǵan.
