OQO-da 150 dáriniń baǵasy qymbattamaıtyn boldy
ShYMKENT. QazAqparat - Ońtústik Qazaqstanda 150 dáriniń baǵasy jyl sońyna deıin kóterilmeıdi. Búgin oblys ákimdigi men Medıtsınalyq jáne farmatsevtıkalyq qyzmetti baqylaý komıtetiniń OQO oblysy boıynsha departamenti, «Damý» OQO farmatsevtıkalyq jáne medıtsınalyq qyzmetkerler qaýymdastyǵy preparattar baǵasynyń ósýine jol bermeýge baǵyttalǵan memorandýmǵa qol qoıdy, dep habarlaıdy QazAqparat HAA tilshisi.
Oblys ákimdiginde ótken sharaǵa oblys ákimi Janseıit Túımebaev pen dárihana uıymdary tarapynan 40 farmatsevtıkalyq uıym basshylary qatysty. Otandyq dárilik zattar men medıtsınalyq buıymdardy óndirýshi kompanııalar men sheteldik taýarlardyń resmı dıstrıbıýtorlary 100-den asa dárilik zattyń baǵasyn kótermeý jóninde ortaq kelisimge keldi. Bul jolǵy kelisim oblystaǵy farmatsevtik mekemeler men dárihanalarda satylatyn dárilik zattardy turaqty baǵada ustaýǵa, sonymen qatar baǵanyń negizsiz kóterilýinen tutynýshylar quqyǵyn qorǵaý jáne áleýmettik alańdaýshylyqty boldyrmaýǵa arnaldy.
«Memorandýmǵa 150 túrli dári-dármek engizilip otyr. Óıtkeni bul dárilerdiń áleýmettik mańyzy zor. Osylaısha biz oblys turǵyndarynyń basym bóligine qoldaý kórsetemiz. Halyqtyń áleýmettik álsiz toptaryna qoldaý bildirip, kelisimge qol qoıyp otyrǵan dárihana basshylaryna ońtústik jurtynyń atynan rızashylyǵymdy bildiremin», - dedi Janseıit Qanseıituly.
Jıynda Farmatsevtıkalyq qyzmetti baqylaý departamentiniń basshysy Lázzat Qashqymbaeva iri tasymaldaýshy fırmalarmen kelisimsharttar jasalyp jatqanyna toqtaldy. Dárihanalar jelileriniń áleýmettik jaýapkershiligi týrasynda da atqaryp jatqan jumystaryn baıandady.
Kezdesýge qatysýshylar tıisti memorandýmǵa qol qoıý halyq arasynda áleýmettik turaqtylyqty qamtamasyz etýde mańyzdy qadam ekendigin atap ótti.
