OQO-da 15 myńnan asa turǵyn «Órleý» jobasynyń paıdasyn kórip otyr
ShYMKENT. QazAqparat - Ońtústik Qazaqstan oblysynda «Órleý» baǵdarlamasyn iske asyrý jumystary qarqyn aldy. Bir ǵana Maqtaral aýdanynda bıyl atalǵan joba aıasynda respýblıkalyq bıýdjetten 963 mıllıon teńge, jergilikti bıýdjetten 600 mıllıon teńge qarjy bólingen. Bul týraly Óńirlik kommýnıkatsııa ortalyǵy uıymdastyrǵan press týr barysynda Maqtaral aýdanynyń ákiminiń orynbasary Maqsat Joldasbekov málim etti, dep habarlaıdy QazAqparat HAA tilshisi.
Maqsat Joldasbekovtyń sózinshe, qomaqty qarjylar bólinýiniń arqasynda 1439 otbasy, ıaǵnı 15493 adam óz kásipterin ashyp, tirligin dóńgeletip otyr.
«Órleý» baǵdarlamasynyń tıimdiligin kórgen kópbalaly ananyń biri - Shynar Sattarova memleketten 450 myń teńge demeý qarjy alyp, Jetisaı qalasynan dámhana ashypty. Qazir munda 5 adam jumyspen qamtylǵan.
«Memlekettiń «Órleý» jobasyn qolǵa alǵany biz sekildi kópbalaly analarǵa mol múmkindik berip otyr. Men óz basym osy jobany paıdalanyp, kásip ashýǵa bel býdym. Ázirge nátıjesi jaman emes. Halyqqa sapaly qyzmet kórsetip, alǵashqy tabystarymyzdy kóre bastadyq», - deıdi Shynar Sattarova.
Munan soń BAQ ókilderi Birlik aýylyna at basyn buryp, Elbasynyń «Bolashaqqa baǵdar: rýhanı jańǵyrý» maqalasynda aıtylǵan «Týǵan jer» baǵdarlamasy aıasynda ashylǵan "Jastar" sport kesheniniń jumysymen tanysty. Sutanbek Qojanov mektebiniń bazasynda ornalasqan keshenniń qaıta qurylymdaý jumystaryn osy aýyldyń týmasy kásipker Abyz Alıpov óz qarjysyna júrgizipti. Munda aýyl jastary bir mezgilde sporttyń voleıbol, basketbol, fýtbol túrlerimen aınalysa alady. Aldaǵy ýaqytta kásipker osy aýyldan sý sporty keshenin salyp berýdi josparlap otyr.
Budan bólek, kásipker aýyldyń kire berisine qaqpa turǵyzyp, baspanasyz júrgen jaǵdaıy tómen otbasyǵa quny 5 mıllıon teńgelik jańa turǵyn úı salyp beripti.
