OQO-da 13 myńnan asa qańǵybas ıt-mysyqtar aýlandy
ASTANA. QazAqparat - Ońtústik Qazaqstan oblysynda bekitilgen josparǵa sáıkes janýarlar arasyndaǵy asa juqpaly aýrýlardyń aldyn alý sharalary júrgizilýde, dep habarlaıdy ákimniń baspasóz qyzmeti.
Búgingi tańda oblys kólemindegi epızootııalyq ahýal turaqty deıgeıde. Búgin bul týraly OQO óńirlik kommýnıkatsııalar qyzmetinde ótken brıfıngte QR AShM veterınarııalyq baqylaý jáne qadaǵalaý komıtetiniń OQO boıynsha aýmaqtyq ınspektsııasynyń basshysy Seıilbekov Tillábek málim etti.
Onyń aıtýynsha, qazirgi ýaqytta naýryz aıyndaǵy jospar tolyǵymen oryndalyp, sáýir aıyndaǵy oryndalatyn is-sharalar atqarylýda. Qutyrý aýrýynyń aldyn alý boıynsha 172 mln teńge qarjy qaralyp, 13 832 qańǵybas ıt-mysyqtar aýlandy.
«Oblys kóleminde veterınarııalyq qaýipsizdikti qamtamasyz etý maqsatynda 49 dana tıptik úlgidegi «Bekkarı» shuńqyry, 272 dana qarapaıym ólekse tastaıtyn shuńqyr jáne 14 dana arnaıy pesh qarastyrylǵan. Al enzootııalyq aýrýlardyń aldyn alý boıynsha oblystyq bıýdjetten 391 mln teńge qaralyp otyr. Qazirgi tańda úı irgelik qoralar men japsarlas aýmaqtary, mal ıirimderi jáne sýattarǵa zalalsyzdandyrý jumystary júrgizilýde», - dedi Tillábek Januzaquly.
Sondaı-aq, 50 ishki saýda orny men 34 mal bazarda azyq-túlik qaýipsizdigin qamtamasyz etý úshin veterınarııalyq-sanıtarııalyq obektilerge jaýapty mamandar bekitilip, kúndelikti baqylaý jáne qadaǵalaý jumystary atqarylyp otyr.
Budan ózge, QR AShM veterınarııalyq baqylaý jáne qadaǵalaý kommıtetiniń «Janýarlardyń asa qaýipti aýrýlarynyń dıagnostıkasy men profılaktıkasy boıynsha 2018 jylǵa arnalǵan veterınarııalyq is-sharalardyń josparyna» sáıkes, oblysta aýyl sharýashylyǵyndaǵy maldar arasyndaǵy indetti aýrýlardyń 13 túrine qarsy qajetti vaktsınalar jetkizilip, egý sharalary tegin júrgizilýde.
Foto: flowersinspace.com
