OQO-da 120-dan astam sheteldik ǵalymdar qatysqan halyqaralyq konferentsııa ótýde
ShYMKENT. QazAqparat - Ońtústik Qazaqstan memlekettik ýnıversıtetinde «Óndiristik tehnologııalar jáne ınjınırıng» atty ІІІ halyqaralyq konferentsııa ótýde, dep habarlaıdy oblys ákimdiginiń baspasóz qyzmeti.
Aımaqtardyń áleýmettik-ekonomıkalyq damý perspektıvasy men ǵylymı-tehnıkalyq qyzmetterdiń nátıjelerin kommertsııalaý máseleleri qaralǵan konferentsııaǵa oblys ákimi Janseıit Túımebaev, QR Bilim jáne ǵylym mınıstrligi men QR Parlamentiniń ókilderi, Italııa, Germanııa, Indonezııa, Amerıka Qurama Shtattary, Slovakııanyń shetel dıplomatııalyq qyzmet - elshilikteri men konsýldyqtarynyń ókilderi qatysty.
Tehnıka ǵylymdarynyń doktory, professor, Qazaqstan Respýblıkasynyń eńbek sińirgen qaıratkeri, QR Ulttyq ǵylym akademııasynyń, QR Ulttyq ınjenerlik akademııasynyń jáne tabıǵat paıdalaný men halyqaralyq ekologııa akademııalarynyń akademıgi, Memlekettik syılyǵynyń laýreaty Bıshimbaev Ýalıhan Qozykeulynyń 70 jyldyǵyna arnalyp otyrǵan konferentsııa jumysyna 46 elden 120-dan astam belgili ǵalymdar qatysýda.
Halyqaralyq konferentsııada baıandama jasaǵan oblys ákimi eńbektiń eń úlkeni - Bilim ekenin atap ótip, jahandaný protsesi barysynda biz bilim sapasyna erekshe kóńil bólýimiz qajettigin nazarǵa aldy.
«Sońǵy jyldary respýblıkamyzda ǵylymnyń barlyq salalary úlken iri jetistikterge qol jetkizdi. Osy jetistikterge úles qosyp otyrǵan Muhtar Áýezov atyndaǵy Ońtústik Qazaqstan memlekettik ýnıversıteti ujymynyń orny bólek. Elimizdiń ǵylymı salasynda ýnıversıtet, kóptegen jyldar boıy joǵarǵy dárejege ıe bolyp keledi, kóptegen jetistikter men marapattary buǵan kýá. Bul, ǵylymı mektepterdiń ary qaraı damýynyń kepili. Búgingi ótkizgeli otyrǵan konferentsııa osy ǵylymı mekteptiń negizin qalaýshy tehnıka ǵylymdarynyń doktory, professor Ýálıhan Qozykeulyna arnalýda»,-dedi ákim.
Sóz sońynda J.Túımebaev «Óndiristik tehnologııalar jáne ınjınırıng» atty úshinshi halyqaralyq konferentsııanyń jumysyna sáttilik tileı otyryp, ýnıversıtettiń barsha professor-oqytýshylar quramyna aldaǵy eńbekterine shyǵarmashylyq shabyt, denderine saýlyq, otbasylaryna amandyq tiledi.
Konferentsııanyń sektsııa jumystary hımııalyq tehnologııalar, munaıhımııa, bıo - jáne nano tehnologııalar, qurylys, tamaq ónerkásibi men agroónerkásip kesheni, ekologııa jáne tabıǵatty tıimdi paıdalaný, «Astana EKSPO-2017» halyqaralyq arnaıy kórme formatyndaǵy jańartylǵan energetıka, energııany saqtaý jáne AT-tehnologııalardy damytýdyń perspektıvti baǵyttary boıynsha júrgizilýde.
