OQO-da 11 jasóspirim sýıtsıdten kóz jumdy
ShYMKENT. QazAqparat - Ońtústik Qazaqstan oblysynda ótken jyly 89 bala óz-ózine qol salyp, ómirimen qoshtaspaq bolǵan. Olardyń 53-ne der kezinde kómek kórsetilip, aman qaldy. Ókinishke qaraı, 11 jasóspirim sýıtsıdten kóz jumdy. Bul týraly búgin óńirdiń psıholog mamandary oblystyq jastar ortalyǵynda málimdedi, dep habarlaıdy QazAqparat HAA tilshisi.
Psıhologııalyq semınar barysynda tájirıbeshi- psıholog Aısulý Bóribaeva kámelet jasyna tolmaǵan balalardyń sýıtsıd jasaýy mamandardy qatty alańdatyp otyrǵanyn aıtady. Óz-ózine qol jumsaý derekteriniń aldyn alý sharalaryn qolǵa alý qajettigin atap ótti. Joǵary synyp oqýshylary men oqý oryndaryndaǵy jastardyń basyn qosqan semınarda sondaı-aq erte júktilik máselesi de sóz boldy.
Ótken jyly óńirde kámeletke tolmaǵandar arasynda 751 júktilik deregi tirkelse, onyń 30 paıyzy oblys ortalyǵynda oryn alǵan.
«Bul semınardyń maqsaty jastardy salaýatty ómir saltyna shaqyrý bolyp tabylady. Qazir psıholog mamandar bilim berý mekemelerinde arnaıy túsindirý jumystaryn júrgizip, túrli jaǵdaılardy mysalǵa keltirýde. Búgingi kúnge deıin 270 jas psıhologtyń kómegine júgindi. Biz osy jumystar óskeleń urpaqqa kómegin tıgizip, jaman ádetterden aýlaq júrýge septigin tıgizer degen senimdemiz»,- deıdi A. Bóribaeva.
