OQO-da 11-synyp oqýshysy terrorızmdi nasıhattaǵany úshin sottaldy

ShYMKENT. QazAqparat - Ońtústik Qazaqstan oblysynda terrorızmdi nasıhattaǵan dep aıyptalǵan 11-synyp oqýshysyna qatysty sot úkimi shyqty, dep habarlaıdy  QazAqparat tilshisi.

Oblystyq  kámeletke tolmaǵandardyń isteri jónindegi mamandandyrylǵan aýdanaralyq soty 18 jastaǵy Shahzat Ismaılovty «dinı alaýyzdyqty qozdyrý» baptary boıynsha kináli dep taýyp, 4  jylǵa bas bostandyǵynan aıyrdy.

Atalǵan sottyń málimetinshe, sottalǵan oqýshy Saıram aýdany Qarabulaq aýylyndaǵy №10 mektebinde bilim alǵan. Al, 2017 jyldyń 16 qarashasynda ol Ulttyq qaýipsizdik komıteti men ishki ister qyzmetkerleriniń qolyna túsken edi. Sebebi, sol kúni quzyrly organ ókilderi  Saıram aýdanynda arnaıy operatsııa júrgizip, terrorızmdi nasıhattaǵan jáne dinı alaýyzdyqty qozdyrǵan degen kúdikpen 11 turǵyndy ustaǵan bolatyn. 

Tergeý barysynda kúdiktilerge  Qylmystyq kodekstiń 256-babynyń 2-bóligi («Terrorızmdi nasıhattaý nemese terrorızm aktisin jasaýǵa jarııa túrde shaqyrý») jáne 174-baptyń 1-bóligi («Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý») boıynsha aıyptar taǵylǵan. Mektep oqýshysy da osy baptarmen aıyptalyp, jazasyn qylmystyq-atqarý júıesiniń ortasha qaýipsizdik mekemesinde óteıtin boldy. Ol sot zalynan qamaýǵa alyndy.

Alaıda aıyptalýshynyń jaqyndary  sot úkimimen keliskisi joq. Olar oblystyq sottyń apellıatsııalyq alqasyna shaǵym túsirmekshi. Bul týraly balanyń qorǵaýshysy Nurlan Qangeldıev málimdedi.

3 mamyr kúni shyqqan sot úkimi kúshine engen.