OQO-da 11 polıtseı esirtki qylmysyna qatysy bar degen kúdikpen qamaýǵa alyndy
ShYMKENT. QazAqparat - Ońtústik Qazaqstan oblysynda 11 polıtseı esirtki qylmysyna qatysy bar degen kúdikpen qamaýǵa alynǵan. Onyń bireýi Qylmystyq atqarý júıesi komıtetine qarasty oblys boıynsha basqarmasynyń qyzmetkeri. Bul týraly búgin oblys prokýrorynyń birinshi orynbasary Qalı Mamataev málimdedi, dep habarlaıdy QazAqparat HAA tilshisi.
Prokýrordyń sózinshe, esirtki qylmysyna qatysty qamalǵan 10 polıtseıdiń 7-eýin oblystyq ІІD-niń ózindik qaýipsizdik qyzmeti basqarmasy ustaǵan. Ózgeleriniń qylmystyq áreketi UQK qyzmetkerleri tarapynan tergelýde.
«Olardyń qandaı qylmys jasaǵany jáne sybaılastary jaıynda aqparat sot úkiminen keıin belgili bolady»,- dedi oblys prokýrorynyń birinshi orynbasary.
Qadaǵalaý organynyń ókili sondaı-aq esirtkige qarsy kúres qylmysy búgin oblystyq prokýratýrada ótken quqyq qorǵaý organdarynyń kezekti Úılestirý keńesinde talqylanǵanyn aıtady. Onda esirtki qylmystaryn ashýǵa baılanysty ishki ister qyzmetkerleriniń jumysy synǵa alynyp otyr.
«Sońǵy eki jyl kóleminde esirtkige qatysy bar uıymdasqan qylmystyq toptardyń ashylý deńgeıi joqtyń qasy, ashylmady dese de bolady. Sondaı-aq tárkilengen esirtkiniń kólemi kóbeıgen. Máselen, aldyńǵy jyldary esirtki zattarynyń salmaǵy 500 keliden assa, qazir sol 2,5 tonna bolyp otyr»,- dedi Qalı Mamataev.
Qazir quqyq qoraý organdarynyń ókilderi esirtki alqaptaryn áýeden kvadrokopterler men ǵaryshtyq baılanys arqyly baqylaýǵa kóshken. Sonyń nátıjesinde oblystyń Arys, Shardara, Otyrar aýdandary aýmaǵynda esirtki shópteri egilgen plantatsııalar kóptep tabylypty. Bul rette prokýror Arys, Syrdarııa ózenderiniń jaǵalarynan esirtki plantatsııalary kóptep anyqtalǵanyn aıtady.
