OQO-da 100-ge jýyq jetim bala baspanaly bolady
ASTANA. QazAqparat - Ońtústik Qazaqstan oblysynda 1 maýsym - Halyqaralyq balalardy qorǵaý kúnine arnalǵan «Árqashan kún sónbesin» atty shara ótti. Merekelik jıynda balalar úıinde tárbılenip jatqan 350-ge jýyq jetkinshekke syı-sııapat jasaldy. Sharaǵa oblys ákimi Janseıit Túımebaev arnaıy qatysyp, búldirshinderdi aıtýly merekemen quttyqtady, dep habarlaıdy QazAqparat.
«Elbasymyz óz sózinde urpaq bolashaǵyna asa mán berip, «Elimizde týǵan árbir balany memleket óz qamqorlyǵyna alýǵa tıis» degen bolatyn. Mine, osy baǵytta oblysta memlekettik baǵdarlama aıasynda 2016-2017 jyldary 142 jetim jáne ata-anasynyń qamqorlyǵynsyz qalǵan balalarǵa úı berildi. 2018 jyly 90 bala úıli bolady. Sondaı-aq jyl saıyn balalar úıiniń tárbıelenýshilerine, joǵary oqý oryndaryna oblys ákiminiń bilim granttary bólinýde. Máselen, ótken jyly 95 grant bólinse, bıyl 100 grant qarastyrylǵan. Bilimdi bolyńdar! Senderdiń elimizdiń bedeldi azamaty bolatyndaryńa kámil senemin», - dedi Janseıit Túımebaev.
Sondaı-aq aımaq basshysy túrli baıqaýlarda top jaryp júrgen ónerli balalar úıiniń 10 oqýshysyn «Alǵys hatpen» marapattady. Odan bólek, jıynǵa qatysqan barlyq balǵyndarǵa túrli oıynshyqtar, kınoteatrǵa jáne Astana qalasyna jasalatyn úshkúndik ekskýrsııaǵa (50 balaǵa) bıletter úlestirdi.
OQO ákimdiginen málim etkendeı, shara barysynda balalarǵa arnalǵan merekelik dastarhan jaıylyp, kontserttik baǵdarlama qoıyldy. Sonymen qatar, balalar Jaılaýkól demalys aımaǵyndaǵy attraktsıondarda kóńil kóterip, asfaltta sýret salý baıqaýyna qatysty.
Aıta keteıik, OQO-daǵy 3 mln halyqtyń 1 mln 240 myńnan astamyn 18 jasqa deıingi balalar quraıdy. Oblysta 2648 jetim jáne ata-anasynyń qamqorlyǵynsyz qalǵan bala bolsa, onyń 2068-i qorǵanshylyq jáne qamqorshylyqqa, 184-i patronattyq tárbıege ótken. 349 bala úılerinde tárbıelenýde.
