OQO-da 10 myń qarııa kommýnaldyq qyzmetti tóleýden bosatylǵan
ShYMKENT. QazAqparat - Halyqaralyq qarttar kúnine oraı oblysta aldyńǵy býyn ókilderine qurmet-iltıpat kórsetý sharalary odan ári jalǵasyn tabýda. Ońtústik Qazaqstan oblysynyń ákimi Janseıit Túımebaev qazynaly qarııalardy quttyqtaý úshin oblystyq ardagerler keńesine arnaıy at basyn burdy, dep habarlaıdy QazAqparat tilshisi.
Aımaq basshysy ortalyq saıabaqqa jınalǵan el aǵalarymen kezdesip, olardyń hal-jaǵdaıyn surady. «Qarty bar úıdiń qazynasy bar» ekenin atap ótip, qoǵam ómirindegi ardagerler atqaryp otyrǵan aýqymdy jumystardy sóz etti. Eldiń birligi, turaqtylyq, urpaqtar sabaqtastyǵy týraly oıyn ortaǵa saldy.
«Ońtústik óńirinde oblysta búginde 200 myńnan asa zeınetker turady. 218 Uly Otan soǵysynyń ardageri bar. Olardyń arasynda keshegi kúni el qorǵaǵan erler de, sharýashylyqtyń san-salasynda eńbek etken kóptegen mamandyq ıeleri de kezdesedi. Ardagerler óz ýaqytynda boıyndaǵy bilimi men biligin, kúsh-jigerin el ıgiligi úshin jumsady, Elbasymyz atap kórsetkendeı endi olardyń qaı-qaısysy da umyt qalmaýy tıis», - dedi Janseıit Túımebaev.
Oblys basshysy aqsaqaldarǵa quttyqtaý sózin aıtyp, otbasylyq qundylyqtar, bala tárbıesi jónindegi eńbekteri úshin jyly lebizin arnady.
«Mynaý tirshilikte, jalpy qoǵamda sizderdiń alatyn oryndaryńyz erekshe. Sizder ońtústik óńiriniń damýyna, elimizdiń egemendigi úshin aıryqsha eńbek sińirdińizder. Sizderdi bizdiń altyn qazynamyz dep esepteımiz. Sondyqtan da aqyl-keńesterińiz, ómirlik tájirıbelerińiz keıingi jastar úshin úlgi ónege», - dedi oblys basshysy.
Aıta keteıik, oblystaǵy zeınetkerlerdiń 600-ge jýyǵy jasy 100-den asqan ata-ájeler, 80-nen astamy - jalǵyzilikti qarııalar. Qýantarlyǵy sol, qarttarǵa degen qamqorlyq jyldan jylǵa artyp keledi. Máselen, jalǵyzbasty qarııalarǵa aı saıyn bir aılyq eseptik kórsetkish esebinde qarjylaı kómek beriledi, 10 myńǵa jýyq qart búginde kommýnaldyq qyzmetti tóleýden bosatylyp, qoǵamdyq kólikterde tegin júrýge múmkindik alyp otyr. Onymen qosa, 3 myńnan asa qarııany túrli basylymdarǵa tegin jazdyrý uıymdastyrylǵan.
