OQO bazarlarynda urlyqpen aınalysqan áıelder toby ustaldy
ShYMKENT. QazAqparat - Ońtústik Qazaqstan oblysyndaǵy bazarlarda qalta urlyǵymen aınalysyp júrgen qylmystyq top ustaldy. 5 qyz-kelinshekten quralǵan top músheleri saýda oryndarynda aqsha, baǵaly zattar men uıaly telefondardy qoldy etip kelipti, dep habarlaıdy QazAqparat HAA tilshisi.
Aıta keteıik, ońaı jolmen oljaly bolyp júrgen kúdiktilerdi óńirdiń tártip saqshylary jedel aldyn alý sharasy barysynda qolǵa túsirgen. Ustalǵan beseýdiń bári jumyssyz, Shymkent qalasy men Sozaq aýdanynyń turǵyndary bolyp shyqty. 23 pen 46 jas aralyǵyndaǵy kúdiktiler negizinen urlyq qylmystaryn halyq kóp shoǵyrlanǵan jerlerde jasap júripti. Biri taýar kórip, satýshynyń kóńilin aýlasa, ózgeleri aqsha men ózge de baǵaly buıymdardy jymqyryp júrgen.
Máselen, ótken jyldyń shilde aıynda bazarda saýda jasaıtyn satýshy polıtsııaǵa aryzdanyp, bir top áıeldiń tonap ketkenin aıtqan. Kıim alamyz dep kelgender aqsha men baǵaly zattar salynǵan sómkesin urlap ketipti. Artynsha osyǵan uqsas ondaǵan saýdager men ózge de turǵyndardan aryz túsken. Naqty sharalarǵa kóshken polıtseıler tájirıbeli mamandardan arnaıy top quryp, urlyq jasap júrgen názik jandardy ustady.
Qazirgi tańda bul toptyń 50 shaqty urlyq qylmystaryn jasaǵany anyqtalyp otyr. Jábirlenýshilerge keltirilgen shyǵyn kólemi 6 mln teńgeni quraǵan. Aıǵaqty zat retinde olardan urlanǵan buıymdar alynyp, birqatary ıelerine qaıtaryldy. Sondaı-aq osy derek boıynsha Qylmystyq kodekstiń 188 baby «Tonaý» boıynsha is qozǵalyp, tergeý amaldary júrgizilýde.
