OQO: Báıdibekte balyq ósirý toǵanyna 50 myń shabaq jiberildi

ASTANA. QazAqparat - Ońtústik Qazaqstan oblysyndaǵy Báıdibek aýdanynda Shaıan ózeniniń jaǵasynan jasalǵan balyq ósirý toǵanyna 50 myń shabaq jiberildi, dep habarlaıdy oblystyq ákimdiktiń baspasóz qyzmeti.

Shaıan ózeniniń jaǵasynan 5 gektar jer alǵan jeke kásipker E.Shynqoja onda úsh balyq ósirý toǵanyn salypty. Al munda sazan men tuqy balyqtarynyń shabaqtaryn jiberý sharasyna Báıdibek aýdany ákiminiń orynbasary N.Aıtbekov, aýyldyq okrýg ákimderi, bólim basshylary men qoǵamdyq uıymdardyń ókilderi, aýyl ardagerleri qatysty.
 

Atalǵan úsh toǵanda jalpy 500 myń balyq ósirýge bolady. Jergilikti jeti adam jumyspen qamtylǵan. Kásipker endi bes gektar jerdiń aýmaǵyna jasyl jelek egip, sý burǵaq ornatýdy jáne demalys aımaǵynyń qurylysyn júrgizip, kelesi jyly paıdalanýǵa berýdi josparlap otyr.

Bul - Báıdibek aýdanynda ashylǵan osy úshinshi balyq sharýashylyǵy. Buǵan deıin 2015 jyly «KazGoldFısht» JShS-i «Dosan-Qarabas» sý qoımasyna 700 myń sazan, aq, qara amýr balyqtaryn jiberse, 2017 jyldyń mamyr aıynda «Nur-Aı» sharýa qojalyǵy «Bógen» ózeniniń jaǵasynan arnaıy toǵan jasap, sazan, aq amýr men karas balyqtarynyń 8 myń shabaǵyn jibergen bolatyn.

Statıstıka boıynsha sý qoımalaryna jiberilgen  shabaqtardyń  70-80 paıyzy ári qaraı ósip jetiledi eken. Balyqtyń bul túrlerin sý aıdyndaryna jiberý kóktem jáne kúz aılarynda júzege asyrylady.