OQO: «Báıdibek bı» anımatsııalyq fılminiń túsaýkeseri ótti
ShYMKENT. QazAqparat - Ońtústik Qazaqstan oblysy Báıdibek aýdanynda "Báıdibek bı" anımatsııalyq fılminiń tusaýkeseri ótti. Jańa anımatsııalyq týyndy kópshilikke aýdannyń 90 jyldyǵy men « Halyqaralyq balalardy qorǵaý kúnine" oraı kórsetildi, dep habarlaıdy QazAqparat tilshisi.
Elbasy Nursultan Nazarbaevtyń "Bolashaqqa baǵdar: rýhanı jańǵyrý" baǵdarlamalyq maqalasy aıasynda daıyndalǵan fılmniń tusaýkeser rásimi Shaıan aýylyndaǵy «Táýelsizdik» alańynda ótti. Saltanatty sharaǵa aýdan ákimi Baqyt Tanagózov pen "SAQ" kınostýdııasynyń dırektory Nýrıddın Patteev, aýdandaǵy máslıhat depýtattary men ardagerler keńesiniń músheleri, mádenıet qyzmetkerleri men mektep oqýshylary jáne balabaqsha búldirshinderi qatysty. Shara barysynda kınostýdııa basshysy aýdan ákimine «Báıdibek bı» anımatsııalyq fılminiń 90 kúıtabaǵyn saltanatty túrde tabys etti. Sóıtip jańa fılmniń alǵashqy kórsetilimin jas kórermender alańdaǵy led ekrannan tamashalady. Fılmniń jelisi Báıdibek baba tarıhyn negizge ala otyryp órbıdi. Ideıa avtory ulttyq tárbıe men salt-dástúrdi keıingi jas urpaqtar boıyna sińirip, óskeleń urpaqty patrıottyq sezimge tárbıeleýdi kózdegen. Anımatsııalyq mýltfılmge jergilikti bıýdjet esebinen 13 mln 800 myń teńge qarjy qaralyp otyr.
Merekelik basqosý barysynda «Sálem saǵan - Astana» sherýi uıymdastyrylyp, ulttyq kıim kıgen 5000 oqýshy aýdan ortalyǵyndaǵy kóshelermen júrip ótti. Sonymen qatar, alańda sýretshiler baıqaýy men sporttyq oıyn túrleri uıymdastyryldy.
