OQO: Báıdibek aýdanynda kópir paıdalanýǵa berildi

ASTANA. QazAqparat - Ońtústik Qazaqstan oblysy Báıdibek aýdanynda 1 jeltoqsan - Qazaqstan Respýblıkasynyń Tuńǵysh Prezıdenti kúnine oraı jaıaý júrginshilerge arnalǵan kópirdiń saltanatty túrde ashylý rásimi ótti, dep habarlaıdy oblystyq ákimdiktiń baspasóz qyzmeti.

Boraldaı aýyldyq okrýgine qarasty Orynbaı Taımanov pen Aqjar eldi mekenderin bólip turǵan jańa aspaly kópirdiń ashylǵanyna jergilikti halyq dán rıza. Sharaǵa Báıdibek aýdany ákiminiń mindetin ýaqytsha atqarýshy Nurǵalı Aıtbekov qatysyp, kópirdiń aýyl jurty úshin qajetti bolǵandyǵyn aıtty. 
 

«Oblystyq bıýdjetten 45 mıllıon 306 myń teńge qarjy bólinip, maýsym aıynda uzyndyǵy 144 metr bolatyn aspaly kópir qurylysyn qolǵa alǵan «JBI-S» JShS-i belgilengen merzimde nysandy el ıgiligine paıdalanýǵa berip otyr. Tuńǵysh Prezıdenti kúnine oraı berilip jatqan kópir el ıgiligine qyzmet ete bersin», - dedi Nurǵalı Mámetuly.

Aıta keterligi, biraz jyldardan beri 300-ge jýyq turǵyny bar Aqjar aýylyn qosatyn kópirdiń nasharlyǵynan Boraldaı ózeninen ótý aýyl turǵyndary úshin qıynǵa soqqan. Kóptiń tilegi oryndalyp, kópirdiń   paıdalanýǵa berilip otyrǵandyǵyna Aqjar eldi mekeniniń turǵyndary rızashylyqtaryn bildirdi.